അച്ഛനെ നഷ്ടപ്പെട്ട അഞ്ചു വയസുകാരിയുടെ വേദന വാക്കുകളില്‍ അറിയിക്കുവാന്‍ സാധിക്കില്ല. എന്നാല്‍ ഈ ചിത്രം ആ വേദനയുടെ പര്യായമാണ്. അച്ഛന്റെ മൃതദേഹത്തിനു മുന്നില്‍ നിന്ന് പൊട്ടികരയുന്ന സേറ എന്ന അഞ്ചു വയസുകാരിയുടെ ചിത്രം കണ്ടു നില്‍ക്കുന്നവരുടെ ഹൃദയം തകര്‍ക്കുന്നതാണ്.

ജമ്മു കാശ്മീരിലെ തീവ്രവാദി ആക്രമണത്തിനിടെ കൊല്ലപ്പെട്ട പൊലീസ് എ.എസ്.ഐ അബ്ദുള്‍ റഷീദിന്റെ മരണാനന്തര ചടങ്ങുകള്‍ക്കിടെയാണ് സേറ പൊട്ടികരഞ്ഞത്. കുട്ടിയുടെ ചിത്രം സഹിതം ജമ്മു കാശ്മീര്‍ പൊലീസ് സമൂഹിക മാദ്ധ്യമങ്ങളില്‍ ഇട്ട പോസ്റ്റിലൂടെയാണ് ചിത്രം പുറത്താകുന്നത്.  

നിന്റെ കണ്ണുനീര്‍ ഹൃദയങ്ങള്‍ തകര്‍ക്കുന്നതാണ്. നിന്റെ അച്ഛന്റെ ജീവത്യാഗം എന്നും ഓര്‍മ്മിക്കപ്പെടും എന്തുകൊണ്ട് ഇത് സംഭവിച്ചു എന്നതിനെ പറ്റി മനസിലാക്കാനുള്ള പ്രായം നിനക്കായിട്ടില്ല. ഞങ്ങളെല്ലാവരെയും പോലെ ജമ്മു കാശ്മീര്‍ പൊലീസിനെ പ്രതിനിധീകരിക്കുന്ന നിന്റെ അച്ഛന്‍ ധൈര്യത്തിന്റെയും ത്യാഗത്തിന്റെയും പ്രതീകമാണ്. സമൂഹത്തിനും രാജ്യത്തിനുമെതിരെ അക്രമം അഴിച്ചുവിടുന്നവര്‍ മനുഷ്യകുലത്തിന്റെ തന്നെ ശത്രുവാണ് അബ്ദുള്‍ റഷീദിന് അന്തിമോപചാരം അറിയിച്ചുള്ള ജമ്മു കാശ്മീര്‍ പൊലീസിന്റെ ഫെയ്‌സ് ബുക്ക് പോസ്റ്റില്‍ പറയുന്നു.

ചിത്രം പുറത്തു വന്നതോടെ സമൂഹ മാദ്ധ്യമങ്ങളില്‍ വ്യാപകമായി ഷെയര്‍ ചെയ്യപ്പെടുകയാണ്.