സ്വിറ്റ്സർലൻഡ് നിർമിത ട്രെയിനുകൾ ഇന്ത്യൻ റെയിൽവേ ട്രാക്കുകളിലൂടെ അധികം താമസിക്കാതെ ഓടിത്തുടങ്ങുമെന്ന് റിപ്പോർട്ട്. ഇതുമായി ബന്ധപ്പെട്ട കരാറുകളിൽ ഇരു രാജ്യങ്ങളും ഒപ്പുവച്ചെന്നാണ് വിവരം. ചരിഞ്ഞ എൻജിനുകളാണ് സ്വിസ് ട്രെയിനുകളുടെ പ്രത്യേകത. ഇറ്റലി, പോർച്ചുഗൽ, സ്ലൊവേനിയ, സ്വിറ്റ്സർലൻഡ്, ചൈന, ജർമനി തുടങ്ങി 11 രാജ്യങ്ങളിലാണ് ഇത്തരം ട്രെയിനുകൾ ഇപ്പോൾ നിലവിലുള്ളത്. സീറ്റുകളിൽ മൃദുവായ കൈപ്പിടികളും, നിന്ന് യാത്രചെയ്യുന്നവർക്ക് ബാലൻസ് തെറ്റാതിരിക്കാനുള്ള സൗകര്യങ്ങളുമുള്ളതാണ് ഇത്തരം ട്രെയിനുകൾ.

സ്വിറ്റ്സർലൻഡ് പാരിസ്ഥിതിക വകുപ്പുമായും, ഗതാഗതവകുപ്പുമായുമാണ് ഇന്ത്യ കരാർ ഒപ്പിട്ടിരിക്കുന്നത്. റെയിൽവേ രംഗത്തെ സഹകരണം ഉറപ്പുവരുത്തുന്നതു സംബന്ധിച്ചാണ് ആദ്യ കരാർ. റെയിൽവേ വൈദ്യുതീകരണവും ടണൽ നിർമാണവുമടക്കമുള്ള കാര്യങ്ങളാണ് ഈ കരാറിലുള്ളത്. കൊങ്കൺ റെയിൽവേ കോർപറേഷനും സ്വിസ് ഫെഡറൽ ഇൻസ്റ്റിറ്റ്യൂട്ട് ഓഫ് ടെക്നോളജിയുമായാണ് രണ്ടാമത്തെ കരാർ.