രാജ്യത്ത് ഗോരക്ഷാ പ്രവര്‍ത്തകരുടെ ആക്രമണങ്ങള്‍ തുടരുന്നു. കഴുതയെ വാഹനത്തില്‍ കൊണ്ടുപോയവരെ ഗോരക്ഷാ പ്രവര്‍ത്തകര്‍ ആക്രമിച്ചു. പശുക്കടത്തെന്നാരോപിച്ചായിരുന്നു ഇവരുടെ മര്‍ദ്ദനം. വാഹനത്തില്‍ കഴുതകളാണെന്ന് മനസിലായതോടെ അക്രമി സംഘം രക്ഷപ്പെട്ടു.

രാജസ്ഥാനിലെ ബര്‍മര്‍ ജില്ലയിലെ സൈല സ്വദേശിയായ കാന്തിലാല്‍ ഭീലാണ് ഇതു സംബന്ധിച്ച് പൊലീസില്‍ പരാതി നല്‍കിയത്. ഭീലും സുഹൃത്തും വാഹനത്തില്‍ കഴുതകളെ കയറ്റി നാട്ടിലേക്ക് വരികയായിരുന്നു.

പിന്തുടര്‍ന്നെത്തിയ സംഘം ആളൊഴിഞ്ഞ സ്ഥലത്ത് വെച്ച് വാഹനം തടയുകയും ഇരുവരേയും വാഹനത്തില്‍ നിന്ന് വലിച്ചിറക്കി മര്‍ദ്ദിക്കുകയുമായിരുന്നു.

എന്നാല്‍ വാഹനത്തില്‍ കഴുതകളാണെന്ന് മനസിലായതോടെ സംഘം കടന്നുകളഞ്ഞെന്ന് ഭീല്‍ പൊലീസില്‍ നല്‍കിയ പരാതിയില്‍ പറയുന്നു. അക്രമത്തില്‍ പരിക്കേറ്റ ഇവരെ പ്രാഥമിക ചികിത്സക്ക് ശേഷം വിട്ടു.