ഗൗരി ലങ്കേഷിന്റെ മരണം മാധ്യമങ്ങളിൽ കോളിളക്കം സൃഷ്ടിച്ചുകൊണ്ടിരിക്കുകയാണ്.അതിനു തൊട്ടു പിന്നാലെ ഗൗരിയുടെ ഫേസ്ബുക് പോസ്റ്റും വൈറലാവുകയാണ്.സംഘപരിവാർ സംഘടനകളെ രൂക്ഷമായി എതിർത്തിരുന്ന അവരുടെ ഫേസ്ബുക് പോസ്റ്റാണ് സമൂഹമാധ്യമങ്ങളിൽ ചർച്ചയാകുന്നത്.സ്വന്തം അഭിപ്രായങ്ങൾ തുറന്ന് പറയാൻ മടി കാട്ടാത്ത ഗൗരി തീവ്രഹിന്ദു നിലപാടുകളെ എതിർത്തിരുന്നു.അതുകൊണ്ട് തന്നെ ബീഫ് കഴിക്കാനുള്ള അഗ്രഹം സമൂഹ മാധ്യമത്തിൽ തുറന്നെഴുതാനും അവർ മടി കാട്ടിയില്ല.

 ശശി തരൂര്‍ എംപി പോസ്റ്റ് ചെയ്ത വീഡിയോയും പോസ്റ്റനുമുകളില്‍ കേരളത്തിന്റെ മതേതരത്വത്തെ പ്രശംസിച്ചെഴുതിയ കുറിപ്പുമാണ് ഗൗരി ലങ്കേഷ് തന്റെ പേജില്‍ ചേര്‍ത്തിയിരിക്കുന്നത്.

കേരളത്തില്‍ ഓണത്തിന് കന്യാസ്ത്രീകള്‍ തിരുവാതിര കളിക്കുന്നതിന്റെ വീഡിയോ പോസ്റ്റ് ചെയ്തതോടൊപ്പം കേരളം എന്തുകൊണ്ട് ദൈവത്തിന്റെ സ്വന്തം നാടായി എന്നതും ഗൗരി ലങ്കേഷ് കുറിക്കുന്നു. അടുത്ത തവണ കേരളത്തില്‍ വരുമ്പോള്‍ തനിക്ക് ആരെങ്കിലും കേരള ബീഫ് ഉണ്ടാക്കി തരണമെന്നും, മലയാളികളോട് ഈ മതേതരത്വത്തിന്റെ ആത്മാവ് എന്നും കാത്ത് സൂക്ഷിക്കണമെന്നും ഗൗരി ലങ്കേഷ് ഫെയ്‌സ്ബുക്കില്‍ കുറിച്ചിരുന്നു. ഗൗരി ലങ്കേഷിന്റെ മരണത്തെ തുടര്‍ന്ന് കേരളത്തെ പ്രശംസിച്ച അവരുടെ വാക്കുകള്‍ ഏറ്റെടുത്തിരിക്കുകയാണ് സമൂഹമാധ്യമങ്ങള്‍.

ഗൗരി ലങ്കേഷ് എന്നും സംഘപരിവാര്‍ അജണ്ടയുടെ കടുത്ത വിമര്‍ശകയായതുകൊണ്ടുതന്നെ കൊലപാതകത്തില്‍ രാജ്യമെങ്ങും കടുത്ത പ്രതിഷേധമാണ് ഉയരുന്നത്.