മുതിർന്ന മാധ്യമപ്രവർത്തക ഗൗരി ലങ്കേഷിനെ അക്രമികൾ വെടിവച്ച് കൊന്ന സംഭവത്തിൽ പ്രതിഷേധം അലയടിച്ചുകൊണ്ടിരിക്കുകയാണ്. സ്വന്തം അഭിപ്രായങ്ങൾ എവിടെയും തുറന്നടിക്കാൻ മടിയില്ലാത്ത ധീര വനിതയായിരുന്നു അവർ. തലയിലും നെഞ്ചിലും വെടിയേറ്റപ്പോൾ പോലും അവർ വാതിൽ തുറന്ന് അകത്തു കയറാൻ ശ്രമിച്ചിരുന്നു. ആശയപരമായ ഭിന്നതയുടെ പേരിൽ പലപ്പോഴും ഗൗരി ലങ്കേഷിനു ആക്രമണങ്ങളും ഭീഷണികളും ഉണ്ടായിട്ടുണ്ട്. വർഗീയതയ്‌ക്കെതിരായ തീവ്ര നിലപാടുകൾ അവർക്ക് നിരവധി ശത്രുക്കളെ സൃഷ്ടിച്ചിട്ടുണ്ട്.

സംഘപരിവാർ സംഘടനകളെ രൂക്ഷമായി എതിർത്തിരുന്ന അവരുടെ ഫേസ്ബുക് പോസ്റ്റിൽ കേരളത്തില്‍ ഓണത്തിന് കന്യാസ്ത്രീകള്‍ തിരുവാതിര കളിക്കുന്നതിന്റെ വീഡിയോ പോസ്റ്റ് ചെയ്തതോടൊപ്പം കേരളം എന്തുകൊണ്ട് ദൈവത്തിന്റെ സ്വന്തം നാടായി എന്നതും ഗൗരി ലങ്കേഷ് കുറിക്കുന്നു. അടുത്ത തവണ കേരളത്തില്‍ വരുമ്പോള്‍ തനിക്ക് ആരെങ്കിലും കേരള ബീഫ് ഉണ്ടാക്കി തരണമെന്നും, മലയാളികളോട് ഈ മതേതരത്വത്തിന്റെ ആത്മാവ് എന്നും കാത്ത് സൂക്ഷിക്കണമെന്നും ഗൗരി ലങ്കേഷ് ഫെയ്‌സ്ബുക്കില്‍ കുറിച്ചിരുന്നു. ഗൗരി ലങ്കേഷിന്റെ മരണത്തെ തുടര്‍ന്ന് കേരളത്തെ പ്രശംസിച്ച അവരുടെ വാക്കുകള്‍ ഏറ്റെടുത്തിരിക്കുകയാണ് സമൂഹമാധ്യമങ്ങള്‍. കേരളീയരുടെ മതേതരത്വത്തെ പ്രശംസിച്ചുകൊണ്ടുള്ള ഗൗരിയുടെ ഫേസ്ബുക് പോസ്റ്റ് മലയാളികൾക്ക് അഭിമാനിക്കാവുന്ന ഒന്നാണ്.