രാജ്യത്ത് നാലു മിനിറ്റിൽ ഒരു റോഡപകടം നടക്കുന്നുണ്ടെന്നാണ് കണക്ക്. പ്രതിവർഷം 1.5 ലക്ഷം റോഡപകടങ്ങൾ ഇന്ത്യയിൽ ഉണ്ടാകുന്നുണ്ടെന്നാണ് ഔദ്യോഗിക കണക്കുകൾ സൂചിപ്പിക്കുന്നത്.ഇതിൽ ഒരു പ്രധാന പങ്ക് മൊബൈൽ ഫോണിനുണ്ട്. ഇരു ചക്ര വാഹനമോടിക്കുന്നവർ പോലും മൊബൈലിൽ സംസാരിച്ചുകൊണ്ടാണ് ഡ്രൈവ് ചെയ്യാറുള്ളത്. ഇന്ത്യൻ ബൈക്ക് യാത്രികരിൽ 60 ശതമാനത്തിലധികവും വാഹനം ഓടിക്കുമ്പോൾ മൊബൈൽഫോൺ ഉപയോഗിക്കുന്നവരാണെന്നത് ഞെട്ടിപ്പിക്കുന്ന സത്യമാണ്.

മൊബൈൽ ഫോണിൽ സംസാരിച്ചു വാഹനമോടിച്ചതു കൊണ്ട് മാത്രം കഴിഞ്ഞ വർഷം 4976 അപകടങ്ങളാണ് റിപ്പോർട് ചെയ്യപ്പെട്ടിട്ടുള്ളത്. ഇതിൽ 2138 പേര് മരിക്കുകയും 4746 പേർക്ക് പരിക്ക് പറ്റുകയും ചെയ്തു.

മൂന്നിലൊന്ന് എന്ന കണക്കിന് കാർ ഡ്രൈവർമാരും യാത്രയ്ക്കിടെ മൊബൈൽ ഫോൺ ഉപയോഗിക്കുന്നവരാണെന്നാണ് പറയുന്നത്. രാത്രികാലങ്ങളിൽ മൊബൈൽ ഫോണിൽ സംസാരിച്ചു വണ്ടി ഓടിക്കുന്ന ട്രക്ക് ഡ്രൈവർമാരും അപകടങ്ങൾ വിളിച്ചു വരുത്താറുണ്ട്.

രാത്രി കാലങ്ങളില്‍ റോഡുകളില്‍ തിരക്ക് കുറവായതിനാല്‍ മിക്ക വാഹനങ്ങളും അമിത വേഗത്തിലാണ് യാത്ര. ഇതില്‍ ഭൂരിഭാഗം പേരും മദ്യപിച്ചു വാഹനം ഓടിക്കുന്നതും അപകടങ്ങള്‍ക്ക് കാരണമാകാറുണ്ട്.

30 ശതമാനം ആളുകൾ വീട്ടിൽ നിന്നുള്ള ഫോൺവിളികൾക്ക് ബൈക്ക് ഓടിക്കുന്നതിനിടയിൽ പോലും മറുപടി നൽകുന്നവരാണ്. അത് കൊണ്ട് തന്നെ മക്കളോ ഭർത്താവോ ഭാര്യയോ ഓഫീസിലേക്ക് പോയി കഴിഞ്ഞാൽ വണ്ടി ഓടിക്കുന്ന സാഹചര്യമാണെന്ന് അറിയാമെങ്കിൽ എന്ത് അത്യാവശ്യമുണ്ടെങ്കിലും വിളിക്കാതിരിക്കാൻ ശ്രദ്ധിക്കണം. അത്പോലെ ഡ്രൈവിങിനിടയിൽ ഒരു കാരണവശാലും മൊബൈൽ ഉപയോഗിക്കുന്നില്ലെന്നു ഉറപ്പു വരുത്തേണ്ടതും നമ്മുടെ കടമയായി ഏറ്റെടുക്കാം