എന്‍സിപി നേതാവ് ശരത് പവാറിന്റെ മകളും എംപിയുമായ സുപ്രിയ സുലെയ്ക്ക് പ്രധാനമന്ത്രി നരേന്ദ്ര മോദി കേന്ദ്ര മന്ത്രി സ്ഥാനം വാഗ്ദാനം ചെയ്തതായി ശിവസേന. ശിവസേനയുടെ മുഖപത്രം സാമ്‌നയില്‍ പ്രസിദ്ധീകരിച്ച ലേഖനത്തിലാണ് എന്‍സിപി, എന്‍ഡിഎയില്‍ ചേരുന്നതിനുള്ള നീക്കം നടക്കുന്നതായി വ്യക്തമാക്കുന്നത്.
എന്‍സിപി എന്‍ഡിഎയില്‍ ചേര്‍ന്നാല്‍ സുപ്രിയയ്ക്ക് കേന്ദ്രമന്ത്രി സ്ഥാനം നല്‍കാമെന്ന് നരേന്ദ്ര മോദി വ്യക്തമാക്കിയിരുന്നതായി ശരത് പവാര്‍ തന്നോട് പറഞ്ഞതായി ശിവസേന നേതാവ് സഞ്ജയ് റൗട്ട് സാമ്‌നയില്‍ എഴുതിയ ലേഖനത്തില്‍ പറയുന്നു. നരേന്ദ്ര മോദിയുമായി ശരത് പവാറും സുപ്രിയയും നടത്തിയ കൂടിക്കാഴ്ചയില്‍ തന്റെ മന്ത്രിസഭയില്‍ സുപ്രിയ ഉണ്ടായിരിക്കണമെന്ന് മോദി പറഞ്ഞതായി പവാര്‍ പറഞ്ഞെന്നും റിപ്പോര്‍ട്ടിലുണ്ട്.
അതേസമയം, എന്‍സിപി, എന്‍ഡിഎയുടെ ഭാഗമാകുമെന്ന രീതിയില്‍ വരുന്ന വാര്‍ത്തകള്‍ മാധ്യമസൃഷ്ടിയാണെന്ന് ശരത് പവാര്‍ പറഞ്ഞതായും ലേഖനത്തില്‍ പറയുന്നുണ്ട്. എന്നാല്‍ പവാര്‍ എന്തു പറഞ്ഞാലും എന്‍സിപിയുടെ സംസ്ഥാന നേതാക്കള്‍ ബിജെപിയുമായി ബന്ധപ്പെട്ടുവരുന്നതായി സഞ്ജയ് റൗട്ട് തന്റെ ലേഖനത്തില്‍ പറയുന്നു.
ധനമന്ത്രി അരുണ്‍ ജെയ്റ്റ്‌ലി, മഹാരാഷ്ട്ര മുഖ്യമന്ത്രി ദേവേന്ദ്ര ഫട്‌നാവിസ് എന്നിവര്‍ ശരത് പവാറുമായി വേദിപങ്കിട്ടിരുന്നു. എന്‍സിപി, എന്‍ഡിഎയുമായി ചേരുന്നതിന്റെ ഭാഗമായാണ് ഇതെന്ന തരത്തില്‍ വാര്‍ത്തകള്‍ പുറത്തുവന്നിരുന്നു. രാഷ്ട്രീയത്തിന് അതീതമായി രാജ്യത്തിന്റെ താല്‍പര്യത്തിനായി നിലകൊള്ളുന്ന നേതാവാണ് ശരത് പവാര്‍ എന്ന് അരുണ്‍ ജെയ്റ്റ്‌ലി അഭിപ്രായപ്പെട്ടിരുന്നു.