സ്കൂളുകളിലെ സുരക്ഷ ഉറപ്പാക്കാന്‍ കര്‍ശന നിര്‍ദേശങ്ങളുമായി സി.ബി.എസ്.ഇ; സ്കൂള്‍ ജീവനക്കാരുടെ മാനസികനിലയടക്കം പരിശോധിക്കണം
ഗുഡ്ഗാവിലെ റിയാന്‍ ഇന്റര്‍നാഷണല്‍ സ്കൂളില്‍ ഏഴ് വയസുകാരനെ കഴുത്തറുത്ത് കൊന്ന സംഭവത്തിന് പിന്നാലെ സ്വകാര്യ സ്കൂളുകളിലെ സുരക്ഷ ഉറപ്പാക്കാന്‍ കര്‍ശന നിര്‍ദേശങ്ങളുമായി സി.ബി.എസ്.ഇ രംഗത്തെത്തി. ഇതുമായി ബന്ധപ്പെട്ട് എല്ലാ സ്കൂള്‍ മാനേജ്മെന്റുകള്‍ക്കും സര്‍ക്കുലര്‍ അയയ്ക്കാനും സി.ബി.എസ്.ഇ തീരുമാനിച്ചു.
സ്കൂളിലെ ജീവനക്കാരുടെ മാനസികാരോഗ്യ പരിശോധന നടത്തണം. അധ്യാപകരും രക്ഷിതാക്കളും വിദ്യാര്‍ത്ഥികളും ഉള്‍പ്പെടുന്ന കമ്മിറ്റികള്‍ രൂപീകരിക്കണം. വിദ്യാര്‍ത്ഥികളുടെ പരാതികള്‍ പരിഹരിക്കാന്‍ കമ്മിറ്റികള്‍ വേണം. സ്കൂളുകളുടെ സുരക്ഷ ഓഡിറ്റ് നടത്തണം തുടങ്ങിയ നിര്‍ദേശങ്ങളാണ് സി.ബി.എസ്.ഇ സര്‍ക്കുലറിലുള്ളത്.നേരത്തെ, രാജ്യത്തെ സ്വകാര്യ സ്കൂളുകളിലെ വിദ്യാര്‍ത്ഥികള്‍ എത്രത്തോളം സുരക്ഷിതരാണെന്ന് പരിശോധിക്കുമെന്ന് സുപ്രീം കോടതി അറിയിച്ചിരുന്നു.
സ്കൂളിലെ രണ്ടാം ക്ളാസ് വിദ്യാര്‍ത്ഥിയായ പ്രഥുമ്നനെ വെള്ളിയാഴ്ചയാണ് കഴുത്തറത്ത് കൊന്ന നിലയില്‍ സ്കൂളിലെ ശുചിമുറിയില്‍ കണ്ടെത്തിയത്. സംഭവത്തില്‍ സ്കൂള്‍ ബസ് കണ്ടക്ടര്‍ അശോകിനെ പൊലീസ് അറസ്റ്റ് ചെയ്തിരുന്നു. ഇയാള്‍ കുറ്റം സമ്മതിച്ചിട്ടുണ്ട്.
അതേസമയം, സ്കൂളില്‍ മതിയായ സുരക്ഷാ മാനദണ്ഡങ്ങള്‍ ഒരുക്കിയിരുന്നില്ലെന്ന് അന്വേഷണത്തില്‍ കണ്ടെത്തിയിട്ടുണ്ട്. സ്കൂളില്‍ നിരവധി സി.സി.ടി.വി കാമറകള്‍ സ്ഥാപിച്ചിട്ടുണ്ടെങ്കിലും അവയൊന്നും തന്നെ പ്രവര്‍ത്തിക്കുന്നുണ്ടായിരുന്നില്ല. സ്കൂളിലെ ബസുകളിലെ ഡ്രൈവര്‍മാര്‍ക്കും കണ്ടക്ടര്‍മാര്‍ക്കുമായി പ്രത്യേകം ശുചിമുറികളും ഉണ്ടായിരുന്നില്ല. പൊലീസിന്റെ സര്‍ട്ടിഫിക്കറ്റോ വേണ്ടത്ര പരിശോധനയോ ഇല്ലാതെയാണ് ഡ്രൈവര്‍മാരേയും മറ്റും നിയമിച്ചതെന്നും മൂന്നംഗ പ്രത്യേക അന്വേഷണ സംഘത്തിന്റെ റിപ്പോര്‍ട്ടില്‍ പറയുന്നു.
https://www.facebook.com/Malayalivartha
