ടീച്ചര്‍ വഴക്ക് പറയുമെന്ന് പേടിച്ച് അഞ്ചാം നിലയില്‍ നിന്നും ചാടി ഒമ്പത് വയസുകാരന്റെ ആത്മഹത്യാശ്രമം. ഹൗറയിലെ കെട്ടിടത്തില്‍ നിന്നുമാണ് കുട്ടി ചാടിയത്. ചോരയില്‍ കുളിച്ച് ഗുരുതരാവസ്ഥയില്‍ കിടന്ന കുട്ടിയെ സി എം ആര്‍ ഐ ആശുപത്രിയിലേയ്ക്ക് മാറ്റി. കുട്ടിയുടെ നില അതീവ ഗുരുതരമാണ്. കുട്ടി സഹപാഠിയുമായി ക്ലാസില്‍ വഴക്കിട്ടിരുന്നു.

ഇക്കാര്യം ടീച്ചര്‍ അറിയുകയും കാര്യം തിരക്കുകയും ചെയ്തു. എന്നാല്‍ സഹപാഠി കുട്ടിയെ കുറ്റപ്പെടുത്തിയാണ് പറഞ്ഞത്. ഇത് കേട്ടതോടെ ടീച്ചര്‍ കുട്ടിയെ വഴക്ക് പറഞ്ഞു. ശിക്ഷ നല്‍കുമെന്നും ഭീഷണിപ്പെടുത്തി. ഇതേതുടര്‍ന്നാണ് കുട്ടി ആത്മഹത്യയ്ക്ക് ശ്രമിച്ചതെന്ന് ഒരു അയല്‍വാസി പറയുന്നു. എന്നാല്‍ കുട്ടിയുടെ രക്ഷിതാക്കള്‍ പരാതി നല്‍കിയിട്ടില്ല. സ്‌കൂള്‍ അധികൃതരും സംഭവത്തോട് പ്രതികരിച്ചിട്ടില്ല.