കോണ്‍ഗ്രസിന്റെ മുതിര്‍ന്ന നേതാവായിരുന്ന ഗുജറാത്ത് മുന്‍ മുഖ്യമന്ത്രി ശങ്കര്‍ സിംഗ് വഗേല പുതിയ പാര്‍ട്ടിയില്‍ ചേര്‍ന്നു. വഗേലയുടെ അനുയായികള്‍ തന്നെ രൂപീകരിച്ച ജന്‍ വികല്‍പ് എന്ന പാര്‍ട്ടിയിലാണ് അദ്ദേഹം അംഗമായത്. പുതിയ രാഷ്ട്രീയ പാര്‍ട്ടിയോ മൂന്നാം മുന്നണിയോ രൂപവത്കരിക്കാന്‍ താനില്ലെന്നു നേരത്തെ വഗേല പറഞ്ഞിരുന്നു.

എന്നാല്‍ ഇതിനു വിരുദ്ധമായാണ് അദ്ദേഹം സ്വന്തം പാര്‍ട്ടി രൂപീകരിച്ചിരിക്കുന്നത്. രാജ്യസഭാ തെരഞ്ഞെടുപ്പില്‍ ബിജെപി സ്ഥാനാര്‍ഥിക്കാണു വഗേല വോട്ട് ചെയ്തത്. അടുത്തിടെ തന്റെ 77ാം ജന്മദിനാഘോഷങ്ങളുടെ ഭാഗമായി ഗാന്ധിനഗറില്‍ സംഘടിപ്പിച്ച പൊതുസമ്മേളനത്തിലായിരുന്നു കോണ്‍ഗ്രസില്‍നിന്ന് രാജിവച്ചതായി വഗേല പ്രഖ്യാപിച്ചത്.

ബിജെപി വിട്ട് വിശാലകോണ്‍ഗ്രസിലേക്കെത്തിയ ആളാണ് വഗേല. 1996-97ല്‍ ബിജെപി ഭരണകാലത്ത് ഗുജറാത്ത് മുഖ്യമന്ത്രിയായിരുന്നു അദ്ദേഹം.