രാഷ്ട്രീയത്തില് ചേരുമെന്ന അഭ്യൂഹങ്ങള്ക്കിടെ കമലഹാസനെ കാണാന് കെജ്രിവാള് ചെന്നൈയിലേക്ക്
രാഷ്ട്രീയത്തില് ചേരുമെന്ന അഭ്യൂഹങ്ങള് നിലനില്ക്കെ തമിഴ്താരം കമലഹാസനെ കാണാനായി ആം ആദ്മി നേതാവും ഡല്ഹി മുഖ്യമന്ത്രിയുമായ അരവിന്ദ് കെജ്രിവാള് വ്യാഴാഴ്ച ചെന്നൈയിലെത്തും. ഇക്കാര്യം കമലഹാസനുമായി ബന്ധപ്പെട്ട വൃത്തങ്ങള് സ്ഥിരീകരിച്ചിട്ടില്ല. എന്നാല് നേരത്തെ നിശ്ചയിച്ചുറപ്പിച്ച പരിപാടികള്ക്കായി കെജ്രിവാള് ചെന്നൈയിലെത്തുമെന്നും ഈ അവസരത്തില് താരവുമായി കൂടിക്കാഴ്ച നടത്തിയേക്കാമെന്നുമാണ് സൂചന. 2015ല് ഡല്ഹിയിലെത്തിയ കമലഹാസന് കെജ്രിവാളിനെ സന്ദര്ശിച്ചിരുന്നു.
നവംബറില് സംസ്ഥാനത്ത് നടക്കാനിരിക്കുന്ന തദ്ദേശ തിരഞ്ഞെടുപ്പുമായി ബന്ധപ്പെട്ട് സെപ്തംബര് അവസാനത്തോടെ കമലഹാസന് സ്വന്തം പാര്ട്ടി രൂപീകരിക്കുമെന്നാണ് റിപ്പോര്ട്ട്. ഇതിനിടെ കേരളത്തിലെത്തിയ താരം മുഖ്യമന്ത്രി പിണറായി വിജയുമായി തമിഴകത്തെ രാഷ്ട്രീയ പ്രശ്നങ്ങള് ചര്ച്ച ചെയ്തിരുന്നു.
സിനിമാ അഭിനയം കേരളത്തില് നിന്ന് തുടങ്ങിയത് പോലെ രാഷ്ട്രീയ പ്രവേശനവും കേരളത്തില് നിന്ന് തുടങ്ങണമെന്ന് ഈ കൂടിക്കാഴ്ചയില് കമലഹാസനോട് പിണറായി ആവശ്യപ്പെട്ടിരുന്നു.
തമിഴ്നാട്ടിലെ ഭരണകക്ഷിയായ അണ്ണാ ഡി.എം.കെയ്ക്ക് എതിരെ ശക്തമായ നിലപാടുമായി താരം രംഗത്തെത്തിയത് രാഷ്ട്രീയത്തിലേക്ക് ഇറങ്ങുന്നതിന്റെ വ്യക്തമായ സൂചനയാണെന്നാണ് വിലയിരുത്തല്. സൂപ്പര്താരം രജനീകാന്ത് രാഷ്ട്രീയത്തില് പ്രവേശിച്ചാല് അദ്ദേഹത്തിനൊപ്പം പ്രവര്ത്തിക്കാന് തയ്യാറാണെന്നും കമലഹാസന് അറിയിച്ചിരുന്നു.
https://www.facebook.com/Malayalivartha
