സ്വയം പ്രഖ്യാപിത ആള്‍ദൈവം ആശ്രമത്തിലെത്തിയ യുവതിയെ പീഡിപ്പിച്ചു. രാജസ്ഥാനിലാണ് സംഭവം. ചണ്ഡിഗഢിലെ ബിലാസ്പുര്‍ സ്വദേശിനിയായ 21കാരിയാണ് 70കാരനായ കൗശലേന്ദ്ര പ്രപഞ്ചാചാര്യ പഹലഹാരി മഹാരാജിനെതിരെ തന്നെ പീഡിപ്പിച്ചുവെന്ന് ബിലാസ്പൂര്‍ പോലീസിൽ പരാതി നൽകിയത്.

നിയമബിരുദധാരിയായ യുവതി പഠനത്തിനു ശേഷം പരിശീലനത്തില്‍ പ്രവേശിച്ചതിനുശേഷം ആശ്രമത്തിന് സംഭാവന നല്‍കുന്നതിന് വേണ്ടി ഓഗസ്റ്റ് ഏഴിന് അല്‍വാറിലെ ആശ്രമത്തിലെത്തിയതായിരുന്നു. യുവതിയുടെ വീട്ടുകാര്‍ കൗശലേന്ദ്രയുടെ ശിഷ്യരാണ്. ഇവരുടെ നിര്‍ദേശപ്രകാരമാണ് ആശ്രമത്തില്‍ സംഭാവന നല്‍കാന്‍ യുവതി പോയത്. ആശ്രമത്തില്‍ വച്ച് പീഡിപ്പിച്ച ശേഷം സംഭവം പുറത്തു പറയരുതെന്ന് കൗശലേന്ദ്ര ഭീഷണിപ്പെടുത്തിയതായും യുവതി പറയുന്നു.

യുവതിയുടെ പരാതിയനുസരിച്ച് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചതായി പോലീസ് അറിയിച്ചു. ആള്‍ദൈവത്തെ തേടി ആശ്രമത്തില്‍ എത്തിയെങ്കിലും ഒരു സ്വകാര്യ ആശുപത്രിയില്‍ ചികിത്സയിലാണെന്ന മറുപടിയാണ് ലഭിച്ചത്. ഡോക്ടറുടെ അനുമതിയോടെ അയാളെ ചോദ്യം ചെയ്യുമെന്ന് സ്‌റ്റേഷന്‍ ഓഫീസര്‍ ഹേംരാജ് മീണ അറിയിച്ചു. ആരോപണ വിധേയനായ ആള്‍ദൈവം യുവതിയുടെ വീട്ടില്‍ പല തവണ സന്ദര്‍ശനം നടത്തിയിട്ടുണ്ടെന്നും പോലീസിന് സൂചന ലഭിച്ചിട്ടുണ്ട്.