നരേന്ദ്ര മോദിയുടെ നാട്യങ്ങളെ പരിഹസിച്ച ചലച്ചിത്ര നടന്‍ പ്രകാശ്​ രാജിനെതിരെ കേസ്​​. ലഖ്​നോ കോടതിയില്‍ ഒരു അഭിഭാഷകനാണ്​ കേസ്​ നല്‍കിയത്​. കേസില്‍ ഒക്​ടോബര്‍ ഏഴിന്​ കോടതി വാദം കേള്‍ക്കും.

തനിക്ക്​ കിട്ടിയ ദേശീയ ചലച്ചിത്ര പുരസ്​കാരങ്ങള്‍ മോദിയുടെയും യോഗിയുടെയും 'അഭിനയ'ത്തിന്​ നല്‍കാന്‍ തോന്നുന്നുവെന്ന് കഴിഞ്ഞ ദിവസം അദ്ദേഹം പരിഹസിച്ചിരുന്നു. ബംഗളൂരുവില്‍ ഡി.വൈ.എഫ്​.ഐ കര്‍ണാടക സംസ്​ഥാന സമ്മേളനം ഉദ്​ഘാടനം ചെയ്യുന്നതിനിടെയായിരുന്നു പരാമര്‍ശം.
മാധ്യമപ്രവര്‍ത്തക ഗൗരി ലങ്കേഷി​​​ന്റെ കൊലപാതകത്തില്‍ പ്രധാനമന്ത്രി നരേന്ദ്ര മോദി പാലിക്കുന്ന മൗനത്തെ രൂക്ഷമായ ഭാഷയില്‍ വിമര്‍ശിച്ചു ​കൊണ്ടാണ്​ ഇൗ പരാമര്‍ശം നടത്തിയത്​. ഗൗരി ലങ്കേഷി​​​ന്റെ കൊലപാതകം ആഘോഷിക്കുന്നവരെ സോഷ്യല്‍ മീഡിയയില്‍ പിന്തുണക്കുന്നത്​ മോദി നിഷേധിച്ചിട്ടില്ലെന്നും ഇത്തരത്തിലുള്ള നിരവധി അക്കൗണ്ടുകള്‍ ​മോദി പിന്തുടരുന്നുണ്ടെന്നും പ്രകാശ്​ രാജ്​ ചൂണ്ടിക്കാട്ടിയിരുന്നു.
കഴിവുള്ള ഇൗ നടന്മാരെ കാണുമ്പോൾ , തനിക്ക്​ ലഭിച്ച അഞ്ചു ദേശീയ പുരസ്​കാരങ്ങളും അവര്‍ക്കു നല്‍കാന്‍ തോന്നുന്നുവെന്നും പ്രകാശ്​ രാജ്​ പറഞ്ഞിരുന്നു​. ഇൗ പരാമര്‍ശത്തിനെതിരെയാണ്​ കേസ്​.