ഇന്ത്യയുടെ ക്രിക്കറ്റ് ഇതിഹാസം സച്ചിന്‍ തെന്‍ഡുല്‍ക്കറിന്റെ ആത്മകഥ പുറത്തിറങ്ങിയതിന് പിന്നാലെ അദേഹത്തിന്റെ ജീവിതത്തെയും ക്രിക്കറ്റ് കരിയറിനെയും ആസ്പദമാക്കി സിനിമ വരുന്നു. ഇനിയും പേരിട്ടിട്ടില്ലാത്ത ഈ ചിത്രത്തില്‍ സച്ചിന്‍ അഭിനയിക്കുമെന്നും സൂചനയുണ്ട്.
മുംബൈ ആസ്ഥാനമായി പരസ്യ ചിത്രങ്ങളും ഷോര്‍ട്ട് ഫിലിമുകളും നിര്‍മിക്കുന്ന കമ്പനിയായ 200 നോട്ട് ഔട്ട് സച്ചിനെക്കുറിച്ച് ചിത്രം നിര്‍മ്മിക്കുന്നതിനുള്ള അവകാശം സ്വന്തമാക്കി കഴിഞ്ഞു. സച്ചിനുമായി ബന്ധപ്പെട്ട വാണിജ്യ കാര്യങ്ങള്‍ കൈകാര്യം ചെയ്യുന്ന വേള്‍ഡ് സ്‌പോര്‍ട്‌സ് ഗ്രൂപ്പിന് വേണ്ടിയാകും ചിത്രം നിര്‍മിക്കുക.
ലണ്ടനില്‍ നിന്നുള്ള പ്രശസ്ത സംവിധായകനും നിര്‍മാതാവുമായ ജയിംസ് എര്‍സ്‌കൈന്‍ ആകും ചിത്രം സംവിധാനം ചെയ്യുക. കായിക രംഗവുമായി ബന്ധപ്പെട്ടുള്ള നിരവധി ചിത്രങ്ങള്‍ സംവിധാനം ചെയ്തിട്ടുള്ള ആളാണ് എര്‍സ്‌കൈന്‍.
ചിത്രത്തിന്റെ പ്രാരംഭ ജോലികള്‍ ഒരു വര്‍ഷം മുമ്പുതന്നെ തുടങ്ങിയതാണെന്നും റിപ്പോര്‍ട്ടുകള്‍ പറയുന്നു. ചലച്ചിത്ര രംഗത്തെ ഒട്ടേറെ പ്രമുഖര്‍ ചിത്രവുമായി സഹകരിക്കുമെന്നാണ് സൂചന.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha