പണം കൊടുത്ത് വാങ്ങുമ്പോള്‍ വാക്കിന് വിലയുള്ളവനെ വാങ്ങിക്കൂടേ;സ്ത്രീധനം ചോദിച്ചവന്റെ കല്ല്യാണം മുടക്കി ഇന്നലെ ഫെയ്‌സ് ബുക്കില്‍ താരമായത് ഈ തൃശൂരുകാരി; അഭിനന്ദനവുമായി റീമയും
വാക്കിന് വില ഇല്ലാത്തവനെ ഇത്രയും പണം കൊടുത്ത് വാങ്ങുന്നത് മുതലാവില്ല. സ്ത്രീധനം ചോദിച്ച് മാര്‍ക്കറ്റില്‍ വിലപേശല്‍ നടത്തുന്നവര്‍ അറിയാന്‍ പഴയ പെണ്‍കുട്ടികള്‍ അല്ല ഇപ്പോള്‍ ഉള്ളവര്‍. അമ്പതുപവനും അഞ്ച് ലക്ഷം രൂപയും സ്ത്രീധനം ചോദിച്ചതിന് പറഞ്ഞുറപ്പിച്ച വിവാഹത്തില്‍ നിന്നും പിന്മാറിയ തൃശ്ശൂര്‍ക്കാരി രമ്യയുടെ ഫെയ്‌സ് ബുക്ക് പോസ്റ്റിന് വ്യാപക അഭിനന്ദനം. സ്ത്രീധനം ചോദിച്ചതിന്റെ പേരില്‍ വിവാഹത്തില്‍ നിന്ന് പിന്മാറുന്നതായി അറിയിച്ച് രമ്യയിട്ട പോസ്റ്റ് തരംഗമായി. റീമാ കല്ലിങ്കലും രമ്യയെ പിന്തുണച്ച് പോസ്റ്റിട്ടു.
വിവാഹദിനം എന്നാണെന്ന് ചോദിക്കുന്നവര്‍ക്ക് ഒരറിയിപ്പ് എന്നു തുടങ്ങുന്ന പോസ്റ്റില്‍ വിവാഹം വേണ്ടെന്ന് വക്കാന്‍ തീരുമാനമെടുത്തിനുള്ള കാരണം വളരെ ശക്തമായി തന്നെ രമ്യ അവതരിപ്പിക്കുന്നു. നിശ്ചയത്തിന് മുമ്പ് വരെ പെണ്‍കുട്ടിയാണ് ധനമെന്നും സ്ത്രീധനം വേണ്ടെന്നും പറഞ്ഞവര്‍ നിശ്ചയശേഷം സ്ത്രീധനം ചോദിച്ചപ്പോള്‍ രമ്യയ്ക്ക് അത് ഉള്‍ക്കൊള്ളനായില്ല. സ്ത്രീധനത്തിന്റെ പേരില്‍ കല്ല്യാണം തന്നെ വേണ്ടെന്ന് വച്ചു. കടുത്ത സ്ത്രീധന വിരോധി ആയതിനാലും, വാക്കിന് വ്യവസ്ഥ ഇല്ലാത്ത ഒരാളെ ഇത്രയും ധനം മുടക്കി വാങ്ങേണ്ടതില്ല എന്ന് വിശ്വസിക്കുന്നതിനാലും താന്‍ വിവാഹത്തില്‍ നിന്ന് പിന്മാറുന്നുവെന്ന് ഫേസ്ബുക്കിലൂടെ വേണ്ടപ്പെട്ടവരെ രമ്യ അറിയിച്ചു.
പെണ്‍കുട്ടികള്‍ ഇവളെ കണ്ടു പഠിക്കണമെന്ന് കമന്റുവരെ രമ്യയുടെ വാളിലെത്തി. റീമ കല്ലിങ്കലും അഭിനന്ദനും ചൊരിഞ്ഞു. അങ്ങനെ ഈ തൃശൂര്‍കാരി ഫെയ്‌സ് ബുക്കില്‍ നിറഞ്ഞു. തനിക്ക് പിന്തുണയറിച്ചിവര്‍ക്ക് നന്ദി അറിയിച്ച് രമ്യ വീണ്ടും രംഗത്തത്തി. വേണ്ടപ്പെട്ടവരെ അറിയിക്കുന്നതിന് വേണ്ടിയിട്ട പോസ്റ്റാണ് ഇതെന്നും ഇത്രത്തോളം തന്റെ വാക്കുകള്‍ ശ്രദ്ധിക്കപ്പെടുമെന്ന് കരുതിയില്ലെന്നും രമ്യ പറഞ്ഞു. ആരേയും വേദനിപ്പിക്കാന്‍ തനിക്കുദ്ദേശമില്ലെന്നും ആരേയും വ്യക്തിപരമായി വേദനിപ്പിക്കാന്‍ തന്റെ പോസ്റ്റ് ഉപയോഗിക്കരുതെന്നും രണ്ടാമത്തെ പോസ്റ്റില്‍ അവള്‍ ആവശ്യപ്പെടുന്നുണ്ട്.
ഏതായാലും സ്ത്രീധനമെന്ന വിപത്തിനെതിരായ പോരാട്ടത്തിന്റെ ഉത്തമ മാതൃകയായി മാറുകയാണ് രമ്യയുടെ പോസ്റ്റ്. അതുകൊണ്ട് തന്നെയാണ് അത് ചര്‍ച്ചയായതും. ഒരു പണിക്കും പോകാതെ സ്ത്രീധനം മാത്രം നോക്കികാലം കഴിച്ചിരിക്കുന്ന യുവാക്കള്‍ മാറിച്ചിന്തിക്കേണ്ടിയിരിക്കുന്നു. നിങ്ങള്‍ക്ക് നിങ്ങള്‍ വിലയിടരുത്, വിലപേശരുത്. സ്ത്രീ തന്നെയാണ് ധനം.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്Likeചെയ്യുക
https://www.facebook.com/Malayalivartha
