സ്വാശ്രയ മെഡിക്കല്‍ പ്രവേശനം : സര്‍ക്കാരിനെ വെല്ലുവിളിച്ച് മാനേജ്‌മെന്റുകള്‍
സ്വാശ്രയ മെഡിക്കല്‍ പ്രവേശനവിഷയത്തില്‍ സര്‍ക്കാരിനെ വെല്ലുവിളിക്കാന്‍ മാനേജ്!മെന്റുകളുടെ നീക്കം. എല്ലാ മെഡിക്കല്‍ സീറ്റിലും സ്വന്തം നിലയ്ക്കു പ്രവേശനം നടത്താനാണ് ഉദ്ദേശം. ഇതിന്റെ ഭാഗമായി കൊളേജുകളിലെ മാനേജ്‌മെന്റ് സീറ്റുകളിലെ പ്രവേശനത്തിന് അപേക്ഷ ക്ഷണിച്ചു. സ്വാശ്രയ കൊളേജുകളിലെ മെഡിക്കല്‍ പ്രവേശനം പൂര്‍ണമായും സര്‍ക്കാര്‍ ഏറ്റെടുത്ത സാഹചര്യത്തിലാണ് മാനേജ്‌മെന്റുകള്‍ ഈ നീക്കം നടത്തിയിരിക്കുന്നത്.നീറ്റ് റാങ്ക് പട്ടികയില്‍ നിന്നു പ്രവേശനത്തിന് അപേക്ഷ ക്ഷണിച്ച് എല്ലാ സ്വാശ്രയ കോളജുകളും പരസ്യം നല്‍കിക്കഴിഞ്ഞു. ക്രിസ്ത്യന്‍ മാനേജ്‌മെന്റുകള്‍ നല്‍കിയ ഹര്‍ജിയിലെ ഹൈക്കോടതി തീരുമാനത്തെ അടിസ്ഥാനമാക്കിയാവും അന്തിമതീരുമാനം.
100% സീറ്റുകളും ഏറ്റെടുക്കാനുള്ള സര്‍ക്കാര്‍ തീരുമാനമാണു സ്വാശ്രയ മാനേജ്‌മെന്റുകളെ ചൊടിപ്പിച്ചത്. കൂടാതെ ഫീസ് ഏകീകരണവും വര്‍ദ്ധനയും പിന്‍വലിക്കാനുള്ള സര്‍ക്കാര്‍ തീരുമാനവും മാനേജ്‌മെന്റുകള്‍ക്ക് സ്വീകാര്യമല്ല. ഈ സാഹചര്യത്തില്‍ 50% സീറ്റുകള്‍ സര്‍ക്കാരിനു കൈമാറാനോ, ആ സീറ്റുകളില്‍ സംസ്ഥാന പ്രവേശന പരീക്ഷയില്‍നിന്നു പ്രവേശനം നടത്താനോ തയാറല്ലെന്നാണു മാനേജ്‌മെന്റുകളുടെ നിലപാട് . സുപ്രീം കോടതി നിര്‍ദ്ദേശം കണക്കിലെടുത്ത് എല്ലാസീറ്റിലും സ്വന്തം നിലയ്ക്കു നീറ്റില്‍നിന്ന് പ്രവേശനം നടത്താമെന്നാണ് ഇപ്പോള്‍ മാനേജ്‌മെന്റുകളുടെ തീരുമാനം.
എന്‍ആര്‍ഐ സീറ്റുകളിലും ഇനി മുതല്‍ സര്‍ക്കാര്‍ നേരിട്ടാവും പ്രവേശനം നടത്തുക. എന്‍ആര്‍ഐ മാനേജ്‌മെന്റ് ക്വാട്ടയിലെ പ്രവേശനം ദേശീയ പൊതുപരീക്ഷയായ നീറ്റ് പരീക്ഷയെ അടിസ്ഥാനമാക്കി നടത്തും.
അതേസമയം, നാലു ക്രിസ്ത്യന്‍ മെഡിക്കല്‍ കോളജ് മാനേജുമെന്റുകള്‍ സമര്‍പ്പിച്ച ഹര്‍ജി ഹൈക്കോടതി ഇന്നു പരിഗണിക്കും. സ്വാശ്രയ വിഷയങ്ങള്‍ പരിഗണിക്കുന്ന പ്രത്യേക ബെഞ്ച് മുമ്പാകെ മറ്റ് മെഡിക്കല്‍ കോളജ് മാനേജുമെന്റുകളും ഇന്ന് ഹര്‍ജി സമര്‍പ്പിച്ചേക്കും. സ്വശ്രയ മെഡിക്കല്‍ കോളജ് മാനേജുമെന്റുകള്‍ ഒറ്റയ്‌ക്കൊറ്റയ്ക്കാണ് ഹര്‍ജി നല്‍കിയത്.
https://www.facebook.com/Malayalivartha
