ഫുള്‍ടൈം ജൂനിയര്‍ ലാംഗ്വേജ് ടീച്ചര്‍-ഹിന്ദി തസ്തികയിലേക്കുള്ള എഴുത്തു പരീക്ഷയിൽ ഏറ്റവും കുറഞ്ഞ മാര്‍ക്ക് കിട്ടിയവർക്കും ഹിന്ദി അധ്യാപകരാകാന്‍ അവസരം. പി.എസ്.സി. നടത്തിയ യോഗ്യതാനിര്‍ണയ പരീക്ഷയില്‍ ഒരു മാര്‍ക്കുപോലും തികച്ച്‌ നേടാത്തവര്‍ക്കും ഈ അവസരത്തിലൂടെ ഹിന്ദി അധ്യാപകരാകാന്‍ പറ്റും. എഴുത്തു പരീക്ഷയിലെ ഏറ്റവും കുറഞ്ഞ മാര്‍ക്ക് മാനദണ്ഡമാക്കിയാണ് പി.എസ്.സി. ചുരുക്കപ്പട്ടിക പ്രസിദ്ധീകരിച്ചിരിക്കുന്നത്. 0.33 മാര്‍ക്കാണ് ജില്ലാടിസ്ഥാനത്തില്‍ നടത്തിയ പരീക്ഷയില്‍ മൂന്ന് ജില്ലകളില്‍ സാധ്യതാ പട്ടികയില്‍ ഉള്‍പ്പെടുത്തുന്നതിനുള്ള കുറഞ്ഞ മാര്‍ക്കായി നിശ്ചയിച്ചിരിക്കുന്നത്. അടുത്തിടെ ചുരുക്കപ്പട്ടിക പ്രസിദ്ധീകരിച്ച മലപ്പുറം ജില്ലയില്‍ യോഗ്യതാ മാര്‍ക്ക് 1.67 ആണ്.തിരുവനന്തപുരത്ത് 43 മാര്‍ക്കാണ് കുറഞ്ഞമാര്‍ക്ക്.
2017-ലായിരുന്നു ജില്ലാടിസ്ഥാനത്തില്‍ പി.എസ്.സി. അപേക്ഷ ക്ഷണിച്ചത്. കണ്ണൂര്‍, കാസര്‍കോട് ജില്ലകളില്‍ രണ്ടും മൂന്നും ഒഴിവുകള്‍ കണക്കാക്കിയിരുന്നെങ്കിലും മറ്റു ജില്ലകളില്‍ ഒഴിവുകളുടെ എണ്ണം കണക്കാക്കിയിരുന്നില്ല. കഴിഞ്ഞവര്‍ഷം ഏപ്രില്‍ രണ്ടിന് നടത്തിയ പരീക്ഷയുടെ ചുരുക്കപ്പട്ടിക പ്രസിദ്ധീകരിച്ചപ്പോഴാണ് പാലക്കാട്, കോഴിക്കോട്, വയനാട് ജില്ലകളില്‍ 0.33 എന്നത് യോഗ്യതാ മാര്‍ക്കായി കണക്കാക്കി ചുരുക്കപ്പട്ടിക പ്രസിദ്ധീകരിച്ചത്. കുറഞ്ഞ മാര്‍ക്ക് യോഗ്യതയായി നിശ്ചയിച്ച പാലക്കാട് 78 പേരും കോഴിക്കോട് 81 പേരും വയനാട് 30 പേരും പട്ടികയില്‍ സ്ഥാനം നേടിയിരിക്കുന്നു. മലപ്പുറത്ത് 174 പേരുണ്ട്. ഈ തസ്തികയിലേക്ക് അപേക്ഷകരുടെ എണ്ണം കുറവായിരുന്നുവെന്നാണ് പി.എസ്.സി. അധികൃതര്‍ പറയുന്നത്.

അംഗീകൃത സര്‍വകലാശാലകളില്‍ നിന്നുള്ള ഹിന്ദി ബിരുദവും കെ-ടെറ്റുമാണ് അടിസ്ഥാന യോഗ്യത. യോഗ്യതാ പരീക്ഷകളായ പ്രവീണ്‍, സാഹിത്യാചാര്യ, രാഷ്ട്രഭാഷാ വിശാരദ്, ഹിന്ദി ഭൂഷണം എന്നിവ ജയിച്ചവര്‍ക്കും അപേക്ഷിക്കാമായിരുന്നു. എന്നാൽ കെ-ടെറ്റ് നിര്‍ബന്ധമാക്കിയത് അപേക്ഷകരുടെ എണ്ണത്തില്‍ കുറവു വരുവാൻ ഇടയായി. മുഴുവന്‍ സമയ ഹിന്ദി ഭാഷ അധ്യാപക (ജൂനിയര്‍) തസ്തികയിലേക്ക് അപേക്ഷകരുടെ എണ്ണം കുറഞ്ഞതാണ് സാധ്യതാപട്ടികയില്‍ ഉള്‍പ്പെടുത്തുന്നതിന് ഏറ്റവും കുറഞ്ഞ മാര്‍ക്ക് യോഗ്യതയായി നിശ്ചയിക്കാന്‍ കാരണം. വിജ്ഞാപനത്തില്‍ പറയുന്ന യോഗ്യതയുള്ളവരാണ് സാധ്യതാപട്ടികയില്‍ ഉള്‍പ്പെട്ടിട്ടുള്ളത്.

യോഗ്യതാ മാര്‍ക്ക്

തിരുവനന്തപുരം43.00
കൊല്ലം 27.67
പത്തനംതിട്ട 28.67
ആലപ്പുഴ 28.67
കോട്ടയം 37.00
എറണാകുളം 32.67
ഇടുക്കി 36.33
തൃശ്ശൂര്‍ 33.00
പാലക്കാട് 0.33
മലപ്പുറം 1.67
കോഴിക്കോട് 0.33
കണ്ണൂര്‍ 40.33
കാസര്‍കോട് 27.00

വയനാട് 0.33