കൊവിഡ് വ്യാപനം രൂക്ഷമായതോടെ കുവൈറ്റ് യാത്രാ നിരോധനം പ്രഖ്യാപിച്ച പശ്ചാത്തലത്തില്‍ പ്രവാസികള്‍ക്ക് കൈത്താങ്ങുമായി ഇന്ത്യന്‍ എംബസി. അവധിക്ക്​ നാട്ടിൽ പോയി യാത്രാനിയന്ത്രണങ്ങളെ തുടർന്ന്​ കുവൈത്തിലേക്ക് മടങ്ങി വരാനാകാതെ കുടുങ്ങി കിടക്കുന്ന പ്രവാസികൾക്കു വേണ്ടി കുവൈത്തിലെ ഇന്ത്യൻ എംബസി രജിസ്​ട്രേഷൻ ഡ്രൈവ്​ നടത്തുന്നു.

കുവൈത്തിലെ ജോലികളിൽ തിരികെ പ്രവേശിക്കണമെന്നു ആഗ്രഹമുള്ളവർ ഇതിൽ എത്രയും പെട്ടെന്ന് രജിസ്‌ട്രേഷൻ ചെയ്യാനാണ് എംബസി പറയുന്നത്.കുവൈത്ത് ഏർപ്പെടുത്തിയ യാത്ര നിയന്ത്രണങ്ങൾ കാരണം ജോലിയ് നഷ്ടപ്പെട്ട പ്രവാസികളെ സഹായിക്കുക എന്ന ലക്ഷ്യത്തോടെയാണ് തിരിച്ചെത്താൻ കഴിയാത്തവരുടെ വിവരങ്ങൾ എംബസി ശേഖരിക്കുന്നത് .

യാത്രാനിയന്ത്രണങ്ങൾ കാരണം പ്രയാസത്തിലായ പ്രവാസികളുടെ പ്രശ്​നങ്ങൾ ഏറ്റവും പുതിയ കണക്കുകൾ സഹിതം കുവൈത്ത്​ അധികൃതരുടെ ശ്രദ്ധയിൽ കൊണ്ടുവരാനാണ്​ നീക്കം​. പ്രവാസികള്‍ക്ക് അനുകൂലമായ നടപടികള്‍ സ്വീകരിക്കുന്നത് മുന്നിൽക്കണ്ടാണ് രജിസ്‌ട്രേഷന്‍ നടപടികള്‍ ആരംഭിച്ചിട്ടുള്ളത്

കൊവിഡ് പ്രതിസന്ധിയെത്തുടർന്ന് നാട്ടിൽ പോയി മടങ്ങിയെത്താനാവാത്തത് മൂലം വിസ കാലാവധി അവസാനിപ്പിക്കാൻ ആയവർ, ജോലിയിൽ തിരികെ പ്രവേശിക്കേണ്ടവർ, ശമ്പളവും മറ്റ് ആനുകൂല്യങ്ങളും ലഭിക്കാനുള്ളവർ എന്നിവർക്ക് ഇന്ത്യൻ എംബസിയിൽ രജിസ്റ്റർ ചെയ്യാം . ഇതിന് പുറമേ കൊവിഡ് പ്രതിസന്ധിയെ തുടർന്ന് കഷ്ടതയനുഭവിക്കുന്ന ഇന്ത്യക്കാർക്ക് എംബസിയിൽ പ്രത്യേക ഹെൽപ്പ് ഡെസ്കിനും രൂപം നൽകിയിട്ടുണ്ട്.

കഴിഞ്ഞ വര്‍ഷം 1,40,000 പ്രവാസികള്‍ കുവൈത്തില്‍ നിന്ന് മടങ്ങിയതായി ഔദ്യോഗിക കണക്കുകള്‍ വ്യക്തമാക്കുന്നു. കൊവിഡ് കാരണമായുണ്ടായ പ്രതിസന്ധിക്ക് പുറമെ സ്വദേശിവത്കരണം ഉള്‍പ്പെടെയുള്ള മറ്റ് കാരണങ്ങളും പ്രവാസികൾക്ക് തിരിച്ചടിയായി . രാജ്യത്തുനിന്ന് മടങ്ങിയ പ്രവാസികളില്‍ 39 ശതമാനവും ഗാര്‍ഹിക തൊഴിലാളികളാണ്.

കൊവിഡ് പ്രതിസന്ധി രൂക്ഷമായതോടെ കുവൈത്ത് പ്രവാസികളുമായി ബന്ധപ്പെട്ട വിവരങ്ങള്‍ എംബസി ശേഖരിച്ച് കുവൈത്ത് അധികൃതർക്ക് നൽകിയിരുന്നു. എന്നാൽ കഴിഞ്ഞ വര്‍ഷം ഇത്തരത്തിൽ വിവരങ്ങള്‍ നല്‍കിയവരും പുതുതായി രജിസ്റ്റര്‍ ചെയ്യണമെന്നും ഇന്ത്യൻ എംബസി അറിയിപ്പിൽ പറയുന്നു. https://forms.gle/sExZK1GKW36BLpVz7 എന്ന ലിങ്ക് വഴി ഗൂഗിൽ ഷീറ്റിലാണ് ഇത് സംബന്ധിച്ച വിവരങ്ങള്‍ നല്‍കേണ്ടത്

യാത്രാ വിലക്ക് ഏർപ്പെടുത്തിയതോടെ ഇന്ത്യന്‍ പ്രവാസികള്‍ക്കുണ്ടായ പ്രശ്‌നങ്ങള്‍ എന്തൊക്കെയാണെന്ന് കണ്ടെത്തുന്നതിന്റെ ഭാഗമായാണ് ഈ നടപടികളെല്ലാം. ഇതുമായി ബന്ധപ്പെട്ട കൂടുതല്‍ വിവരങ്ങള്‍ എംബസിയുടെ www.indembkwt.gov.in എന്ന വെബ്‌സൈറ്റിലോ ട്വിറ്റര്‍, ഫെയ്‌സ്ബുക്ക് അക്കൗണ്ടുകളിൽ നിന്നോ ആവശ്യക്കാർക്ക് ലഭിക്കും. ഇതിന് പുറമേ കൂടുതല്‍ വിവരങ്ങള്‍ അറിയാൻ cw1.kuwait@mea.gov.inലേക്ക് ഇമെയില്‍ വഴിയും ബന്ധപ്പെടാം.