അധ്യാപക നിയമന ശുപാര്ശകള് പി.എസ്.സി. താല്ക്കാലികമായി നിര്ത്തിവച്ചു.
ലോവര് പ്രൈമറി അപ്പര് പ്രൈമറി അധ്യാപക നിയമന ശുപാര്ശകള് പി.എസ്.സി. താല്ക്കാലികമായി നിര്ത്തിവച്ചു. കേരള ടീച്ചേഴ്സ് എലിജിബിലിറ്റി ടെസ്റ്റ്(കെടെറ്റ്) അധ്യാപകയോഗ്യതയാക്കിയതുമായി ബന്ധപ്പെട്ട് അവ്യക്തത നിലനില്ക്കുന്നതാണ് കാരണം. 2011ലെ വിദ്യാഭ്യാസാവകാശനിയമത്തിന്റെ ഭാഗമായുള്ള യോഗ്യതാപരീക്ഷയാണ് കേരള ടീച്ചേഴ്സ് എലിജിബിലിറ്റി ടെസ്റ്റ് (കെ-ടെറ്റ്). 2016 ഓഗസ്റ്റ് 30 നാണ് സ്കൂള് അധ്യാപക നിയമനങ്ങള്ക്ക് കെ-ടെറ്റ് നിര്ബന്ധമാക്കിക്കൊണ്ടുള്ള സര്ക്കാര് ഉത്തരവ് നിലവില് വന്നത്. ഇതുപ്രകാരം 2012 ജൂണ് ഒന്നിനുശേഷം അധ്യാപകരായി നിയമനം നേടിയവര് 2018 നകം കെ-ടെറ്റ് നേടണമെന്നും വ്യവസ്ഥയുണ്ടായി.
ഇതുമായി ബന്ധപ്പെട്ട കോടതിവിധികളും നിയമങ്ങളും പരിശോധിക്കാന് പി.എസ്.സി. ഉപസിമിതിയെ നിയമിച്ചു. കെടെറ്റുമായി ബന്ധപ്പെട്ടുള്ള കോടതികളിലെ കേസുകളും പി.എസ്.സി.യുടെ ഉപസമിതി. ഉപസമിതിയുടെ നിര്ദേശം അനുസരിച്ച് കമ്മിഷന് തീരുമാനം എടുക്കും. ഇതുസംബന്ധിച്ച് തീരുമാനം ആകുന്നതുവരെ അധ്യാപക നിയമന ശുപാര്ശകള് അയക്കേണ്ടതില്ലെന്ന് പി.എസ്.സി. ജില്ലാ ഓഫീസര്മാരെ അറിയിച്ചു.
എന്നാല് ഇതുവരെ തുടര്ന്നുവന്ന ചട്ടത്തില് മാറ്റമൊന്നും വരുത്താത്ത സാഹചര്യത്തില് കെ-ടെറ്റ് യോഗ്യതയാക്കാന് പാടില്ലെന്നായിരുന്നു പി.എസ്.സി. യുടെ വാദം. അതതുകൊണ്ടുതന്നെ നിലവിലുള്ള റാങ്ക് പട്ടികയില്നിന്ന് പി.എസ്.സി. നിയമനം നടത്തിവരികയായിരുന്നു. എന്നാല് കെടെറ്റ് ഉള്പ്പെടുത്താന് വിശേഷാല് ചട്ടം ഭേദഗതി ചെയ്യുമെന്ന വ്യവസ്ഥ ഒഴിവാക്കി 2016 ഡിസംബര് എട്ടിന് സര്ക്കാര് പുതിയ ഉത്തരവിറക്കി. ഇതോടെ പി.എസ്.സി.യുടെ അധ്യാപക നിയമന നടപടികള് പ്രതിസന്ധിയിലായി. നിയമപരമായ നടപടികള് നേരിടേണ്ടി വരുമെന്നതിനാലാണ് തത്കാലം നിയമനങ്ങള് നിര്ത്തിവെക്കാന് പി.എസ്.സി. യോഗത്തില് ധാരണയായത്. എന്നുമുതല് നിയമനം പുനരാരംഭിക്കാനാകുമെന്ന് വ്യക്തമല്ല.
2011 ഏപ്രിലിലാണ് ആദ്യ ഉത്തരവിറങ്ങിയത്. 2013 മുതല് കെടെറ്റ് നടത്താന് എസ്.സി.ഇ.ആര്.ടി.യെ സംസ്ഥാന സര്ക്കാര് ചുമതലപ്പെടുത്തി. വര്ഷത്തില് രണ്ടുപ്രാവശ്യം കെടെറ്റ് നടത്തുമെന്ന് സര്ക്കാര് പ്രഖ്യാപിച്ചിട്ടുണ്ട്. അടുത്ത പരീക്ഷയ്ക്കുള്ള വിജ്ഞാപനം ഉടന് പ്രസിദ്ധീകരിക്കും. എല്.പി., യു.പി., ഹൈസ്കൂള് അസിസ്റ്റന്റ്, ഭാഷാ അധ്യാപകര് എന്നിവര്ക്കെല്ലാം കെടെറ്റ് നിര്ബന്ധമാണ്. സിടെറ്റ്, നെറ്റ്, സെറ്റ്, എം.ഫില്, പിഎച്ച്.ഡി., എം.എഡ്. എന്നിവ നേടിയവരെ കെടെറ്റ് നിബന്ധനയില് നിന്നൊഴിവാക്കിയിട്ടുണ്ട്. കെടെറ്റ് നിര്ത്തലാക്കണമെന്നാണ് സര്ക്കാര് അനുകൂല അധ്യാപകസംഘടനകള് ആവശ്യപ്പെടുന്നത്. വിവിധ വിഷയങ്ങള്ക്കുള്ള എച്ച്.എസ്.എ. റാങ്ക്പട്ടിക ജില്ലാതലത്തില് പി.എസ്.സി. പ്രസിദ്ധീകരിച്ചുതുടങ്ങി. എന്നാല് ഇതില് നിന്നുള്ള നിയമനശുപാര്ശകള് തല്ക്കാലം നടത്തില്ല എന്ന് പി.എസ്.സി. അറിയിച്ചിട്ടുണ്ട്.
https://www.facebook.com/Malayalivartha
