ചില കുട്ടികളുണ്ട് അച്ഛനമ്മമാരെ സോപ്പിട്ട് ചുളുവിൽ ചില കാര്യങ്ങൾ നേടിയെടുക്കും. ചിലർ കരഞ്ഞും ഭീഷണിപ്പെടുത്തിയുമൊക്കെയായിരിക്കും സ്വന്തം ആവശ്യങ്ങൾ നിറവേറ്റുന്നത്.അതുപോലെ അച്ഛനമ്മമാർക്കു മുന്നിൽ ചില നിബന്ധനകൾ വെച്ച് സൂത്രത്തിൽ ചില കാര്യങ്ങൾ നേടിയെടുക്കാൻ ശ്രമിച്ച പെൺകുട്ടിയാണ് അച്ഛന്റെ സ്മാർട്ട്നെസ്സിനു മുന്നിൽ ഇളിഭ്യയായത്.

തന്റെ പിറന്നാൾ ദിനത്തിൽ അച്ഛനമ്മമാർക്കെഴുതിയ കത്തിലൂടെയാണ് അവൾ തന്റെ ആവശ്യങ്ങൾ മാതാപിതാക്കളെ അറിയിച്ചത്. പിറന്നാൾ ദിവസം പിറന്നാൾ കുട്ടി പറയുന്ന എന്താവശ്യവും നിറവേറ്റിക്കൊടുക്കാൻ ബാധ്യസ്ഥരാണ് മാതാപിതാക്കളെന്നും. ഇനിയവർക്ക് അതിനു താല്പര്യമില്ലെങ്കിൽ താനതിന് 5000 പാക്കിസ്ഥാനി രൂപ പിഴയീടാക്കുമെന്നുമായിരുന്നു കത്തിലെ ഭീഷണി.തന്റെ ആവശ്യങ്ങൾ അംഗീകരിക്കണമെന്നാവശ്യപ്പെട്ടെഴുതിയ കത്ത് ഒപ്പിടുവിക്കാൻ മാതാപിതാക്കളുടെ കൈയിൽ കൊടുത്തപ്പോഴാണ് കഥയിലെ ട്വിസ്റ്റ് സംഭവിച്ചത്. പിതാവ് കത്തിൽ ഒപ്പിടുകയും കത്തിൽ പരാമർശിച്ചിരിക്കുന്ന 5000 എന്ന തുകയുടെ മൂൻപിലായി പൂജ്യം എഴുതിച്ചേർക്കുകയും ചെയ്തു.പെൺകുട്ടിയുടെ സഹോദരനാണ് പെൺകുട്ടിയുടെ കത്ത് സമൂഹമാധ്യമങ്ങളിൽ പങ്കുവെച്ചത് .ഇപ്പോൾ സോഷ്യൽ മീഡിയയിലെ ചർച്ചാവിഷയം ഈ കുടുംബകഥയാണ് .