കൊതുക് എല്ലാവരെയും കടിക്കാറുണ്ടെങ്കിലും ചിലരോട് കൊതുകിന് അല്‍പ്പം പ്രിയം കൂടുതലാണ്. അതിനാല്‍ തന്നെ അത്തരക്കാരെ തേടിപ്പിടിച്ച് കടിക്കാന്‍ കൊതുക് ശ്രദ്ധിക്കാറുമുണ്ട്. ഇതെന്താ ഇങ്ങനെയെന്ന് ആളുകള്‍ ചോദിക്കുന്നത് കേട്ടിട്ടില്ലേ? അതിന് വ്യക്തമായ കാരണമുണ്ടെന്നതാണ് വാസ്തവം.

നമ്മള്‍ ധരിക്കുന്ന വസ്ത്രത്തിന്റെ നിറം മുതല്‍ ശരീരത്തില്‍ അടങ്ങിയിട്ടുള്ള കാര്‍ബണ്‍ഡൈ ഓക്‌സൈഡിന്റെ അളവും രക്തഗ്രൂപ്പും വരെ കൊതുക് കടിക്കുന്നതിന് കാരണമാകുന്നുണ്ട്.

കൊതുകുകള്‍ക്ക് വളരെ പ്രധാനമാണ് കാഴ്ച. അതിനാല്‍ തന്നെ ചില വസ്ത്രത്തിന്റെ നിറം കൊതുകിനെ പെട്ടെന്നാകര്‍ഷിക്കും. നേവി ബ്ലൂ, ഓറഞ്ച്, കറുപ്പ്, ചുവപ്പ് നിറങ്ങളിലെ വസ്ത്രം ധരിച്ചിരിക്കുന്നവരെ പെട്ടെന്ന് കൊതുക് കടിക്കാന്‍ ഇടയുണ്ട്.

വലിയ ശരീരം ഉള്ളവരില്‍ കാര്‍ബണ്‍ ഡൈ ഓക്‌സൈഡ് ഉല്‍പ്പാദിപ്പിക്കുന്നതിന്റെ അളവ് കൂടുതലായിരിക്കും. ശരീരത്തില്‍ നിന്നും കൂടുതല്‍ കാര്‍ബണ്‍ഡൈഓക്‌സൈഡ് പുറത്തുവിടുന്നവരെ കൊതുകുകള്‍ കൂടുതല്‍ ആക്രമിക്കും.

മറ്റുള്ളവരെ അപേക്ഷിച്ച് കൂടുതല്‍ കാര്‍ബണ്‍ഡൈഓക്‌സൈഡ് പുറത്തുവിടുന്നവരാണ് ഗര്‍ഭിണികള്‍. അതിനാല്‍ തന്നെ അവരും കൂടുതല്‍ കൊതുകുകടി അനുഭവിക്കേണ്ടിവരും.

മുട്ടയിട്ടു പെരുകുന്ന പെണ്‍കൊതുകുകള്‍ രക്തത്തിലെ പ്രോട്ടീനുകള്‍ ശേഖരിക്കാറുണ്ട്. ഇതിനായി ഒ-ഗ്രൂപ്പുകാരെ കൊതുകുകള്‍ തിരഞ്ഞുപിടിച്ച് കടിക്കും.കൊതുക് തീരെ കടിക്കാത്തത് എ ഗ്രൂപ്പ് രക്തമുള്ളവരെയാണ്. ഇതിന്റെ ഇടയ്ക്കുള്ള സ്ഥാനമാണ് ബി, എബി ഗ്രൂപ്പ് രക്തമുള്ളവര്‍ക്ക് ഉള്ളത്.

നമ്മുടെ ശരീരം പുറന്തള്ളുന്ന വിയര്‍പ്പിലൂടെ പോലും കൊതുകുകള്‍ക്ക് രക്തത്തിന്റെ പ്രത്യേകത മനസിലാക്കാനാകും എന്നാണ് കണ്ടെത്തിയിരിക്കുന്നത്.