കൊറോണ വ്യാപനത്തെ തുടർന്ന് പ്രഖ്യാപിച്ച ലോക്ക് ഡൗണ്‍ സമയത്ത് വിദേശത്തേക്ക് പോകാന്‍ വിമാനം ബുക്ക് ചെയ്ത് മുടങ്ങിയവർക്ക് പണം തിരിച്ചു നൽകാതെ ചില ട്രാവൽ ഏജൻസികൾ ഒളിച്ചുകളിക്കുന്നതായി പരാതി. വ്യോമയാന വകുപ്പ് നല്‍കിയിരിക്കുന്ന നിര്‍ദ്ദേശം അനുസരിച്ച് യാത്ര ചെയ്യാന്‍ സാധിക്കാത്തവര്‍ക്ക് പണം തിരിച്ചു നല്‍കണം അല്ലെങ്കില്‍ മറ്റൊരു ദിവസം യാത്രാ തീയതി നല്‍കണം എന്നതാണ്. എന്നാല്‍ ചില ട്രാവല്‍ ഏജന്‍സികള്‍ ഉപഭോക്താക്കള്‍ക്ക് പണം തിരിച്ചു നല്‍കുകയോ യാത്രക്കായി മറ്റൊരു തിയതി അനുവധിക്കുകയോ ചെയ്തിട്ടില്ലെന്ന പരാതിയാണ് ഉയരുന്നത്. ഒരു പ്രമുഖ മാധ്യമമാണ് വാര്‍ത്ത റിപ്പോര്‍ട്ട് ചെയ്തിരിക്കുന്നത്.

ഇതുകൂടാതെ വിമാനം റദ്ധാക്കിയത് കാരണം ട്രാവൽ ഏജൻസികളും ഓൺലൈൻ സൈറ്റുകളും പൂട്ടിയിരുന്നു. വ്യോമയാന വകുപ്പിന്റെ നിർദേശത്തെ തുടർന്ന് പല എയർലൈനുകളും ടിക്കറ്റ് തുക തിരിച്ചുനൽകിയിരുന്നു. എന്നാല്‍ ചില ട്രാവല്‍ ഏജന്‍സികള്‍ ഉപഭോക്താക്കള്‍ക്ക് പണം നല്‍കാതെ പറ്റിക്കുകയാണ് ചെയ്തിരിക്കുന്നത്. പലരും ഏജന്‍സികളെ സമീപിച്ചപ്പോള്‍ എയർലൈനിൽനിന്നും പണം ലഭിച്ചിട്ടില്ലെന്നാണ് വിവരം ലഭിച്ചത്. എന്നാല്‍ സംശയം തോന്നിയ ചിലര്‍ ടിക്കറ്റ് കോപ്പിയുമായി എയർലൈൻ ഓഫീസുകളില്‍ എത്തിയപ്പോഴാണ് സംഭവം പുറത്തറിയുന്നത്.

ഏതു അക്കൗണ്ട് ഉപയോഗിച്ചാണ് ടിക്കറ്റെടുത്തത് അതേ അകൗണ്ടിലേക്ക് പണം നിക്ഷേപിച്ചതായി എയർലൈൻ അധികൃതർ അറിയിക്കുകയായിരുന്നു. ഇക്കാര്യം ട്രാവല്‍ ഏജന്‍സികളെ അറിയിച്ചപ്പോള്‍ അടുത്ത ടിക്കറ്റ് എടുക്കുമ്പോള്‍ ആ തുകയില്‍ ചേര്‍ക്കാം എന്നാണ് അറിയിച്ചതെന്ന് റിപ്പോര്‍ട്ട് ചെയ്യുന്നു.

കൊറോണ കാലം യാത്ര ചെയ്യാന്‍ സാധിക്കാത്ത ടിക്കറ്റ് മാറ്റിയെടുക്കാൻ എമിറേറ്റ്സ് എയർലൈൻസ് കൂടുതൽ സാവകാശം നൽക്കുകയാണ് ചെയ്തത്. 2020 സെപ്റ്റംബറിനു മുൻപ് ടിക്കറ്റ് ബുക്ക് ചെയ്തവര്‍ക്ക് 2021 ഡിസംബർ 31നു മുൻപ് വരെ സമയം നല്‍കിയിട്ടുണ്ട്. ഇതിന് സാധിക്കാത്തവര്‍ക്ക് 36 മാസത്തിനകം യാത്ര ചെയ്താല്‍ മതിയാകും. 2020 ഒക്ടോബർ ഒന്നിനു ശേഷം ബുക്ക് ചെയ്തവര്‍ക്ക് 2021 ഡിസംബർ 31നകം യാത്ര ചെയ്യാം. ഇനി അതിന് സാധിച്ചില്ലെങ്കില്‍ 24 മാസത്തിനുള്ളില്‍ ഇത് ഉപയോഗപ്പെടുത്താം.

2020 മാർച്ച് 23ന് മുൻപ് ടിക്കറ്റ് ബുക്ക് ചെയ്ത് കൊവിഡ് കാരണം യാത്ര ചെയ്യാന്‍ സാധിക്കാത്തവര്‍ക്ക് ടിക്കറ്റ് മാറ്റിയെടുക്കാവുന്നതാണ്. അല്ലങ്കില്‍ ടിക്കറ്റ് റദ്ദാക്കി പണം തിരിച്ചെടുക്കാവുന്നതാണ്. ഇനി മറ്റൊരു തിയതിലേക്കാണ് ഈ ടിക്കറ്റ് മാറ്റുകയാണെങ്കില്‍ ഫീസ് നല്‍കേണ്ടതില്ല. എന്നാല്‍ ടിക്കറ്റിന്‍റെ നിരക്കില്‍ ചെറിയ വിത്യാസങ്ങള്‍ വന്നേക്കാം. അത് നല്‍ക്കേണ്ടിവരും. ടിക്കറ്റ് റദ്ദാക്കുമ്പോൾ ക്യാൻസലേഷൻ ചാർജ് കഴിച്ചുള്ള തുക തിരിച്ചുകിട്ടും.

സാധാരണ വിമാന സര്‍വീസ് ആരംഭിച്ചിട്ടില്ലാത്തതിനാൽ പല സ്വകാര്യ എയർലൈനുകളും ഒരു വര്‍ഷത്തേക്ക് ട്രാവൽ വൗച്ചർ നൽകുന്നുണ്ട്. ഇതു സംബന്ധിച്ച് ഓരോ എയർലൈനുകളുടെയും നിയമങ്ങളിൽ വിത്യാസം ഉണ്ടാകും. ഇത് നേരിട്ടു തന്നെ ഉറപ്പാക്കണം.