കോയമ്പത്തൂർ നഗരത്തിലെ വി.ഒ.സി പാർക്ക്​ കാഴ്​ചബംഗ്ലാവിൽ അണലി 33 പാമ്പിൻ കുഞ്ഞുങ്ങൾക്ക്​ ജന്മം നൽകി. രണ്ട്​ ദിവസം മുമ്പായിരുന്നു പ്രസവം. പിന്നീട്​ മുഴുവൻ കുഞ്ഞുങ്ങളെയും വനം അധികൃതർക്ക്​ ​കൈമാറിയതായി കാഴ്​ചബംഗ്ലാവ്​ ഡയറക്​ടർ ശെന്തിൽനാഥൻ അറിയിച്ചു.

കോവിഡ്​ നിയന്ത്രണങ്ങളുടെ പശ്ചാത്തലത്തിൽ കാഴ്​ചബംഗ്ലാവ്​ അടച്ചിട്ടിരിക്കയാണ്​. ജൂണിലാണ്​ കോയമ്പത്തൂരിലെ കോവിൽമേട്​ ഭാഗത്തെ സ്വകാര്യ വ്യക്തിയുടെ വീട്ടിലെ കക്കൂസിൽനിന്ന്​​​ ഗർഭിണിയായ അണലിപാമ്പിനെ പ്രഫഷനൽ പാമ്പ്​ പിടിത്തക്കാരന്റെ സഹായത്തോടെ പിടികൂടിയത്​. തുടർന്ന്​​ കാഴ്​ചബംഗ്ലാവിന്​ കൈമാറുകയായിരുന്നു.

കുഞ്ഞുങ്ങളെ പ്രസവിക്കുന്ന കരയിലെ ഏക വിഷപാമ്പാണ്​ അണലി. ആറുമാസക്കാലം നീളുന്ന ഗർഭകാലയളവിൽ മുട്ടകളുടെ രൂപത്തിലാണ്​ ഇവയുടെ കുഞ്ഞുങ്ങൾ ഉണ്ടാവുക. മുട്ടത്തോട്​ പോലെ കാണപ്പെടുന്ന നേരിയ ചർമം ഭേദിച്ചാണ്​ കുഞ്ഞുങ്ങൾ പുറത്തുവരിക. ശനിയാഴ്​ച അണലി പാമ്പുകളെ കേരളാതിർത്തിയായ ആനക്കട്ടി വനത്തിൽ​ കൊണ്ടുവിട്ടതായി വനം അധികൃതർ അറിയിച്ചു.