വികസിത രാജ്യമാകാനുള്ള കുതിപ്പിലാണെങ്കിലും ലോകത്തിലെ ശതകോടീശ്വരന്മാരുടെ എണ്ണത്തിന്റെ കാര്യത്തില്‍ ഇന്ത്യ വളരെ വലിയ വികസിത രാജ്യമാണ്.

അംബാനി, അദാനി, ശിവനാടാര്‍, സൈറസ് പൂനെവാല, ലക്ഷ്‌മി മിത്തല്‍, സാവിത്രി ജിൻഡാല്‍, ദിലീപ് സാംഗ്‌വി എന്നിങ്ങനെ പോകുന്ന നീണ്ട പട്ടിക. ആ പേരുകളെല്ലാം നമ്മള്‍ പലകുറി കേട്ടിട്ടുള്ളതാണ്. എന്നാല്‍ പൊതുജനത്തിന് അധികം പ്രശസ്തരല്ലാത്ത, എന്നാല്‍ കുബേരന്മാരായ നിരവധി പേര്‍ ഇന്ത്യാ മഹാരാജ്യത്തുണ്ട്. ആ പേരുകളിലൊന്നാണ് പങ്കജ് ഓസ്‌വാള്‍.

അടുത്തിടെ പങ്കജ് ഓസ്‌വാള്‍ വാര്‍ത്തകളില്‍ നിറഞ്ഞത് അദ്ദേഹം വാങ്ങിയ ഒരു വില്ലയുടെ പേരിലാണ് . ലോകത്തിലെ തന്നെ ഏറ്റവും വിലയേറിയ വീടുകളിലൊന്ന് സ്വന്തമാക്കിയിരിക്കുകയാണ് ഇന്ത്യന്‍ കോടീശ്വര ദമ്പതികളായ പങ്കജ് ഓസ്വാളും ഭാര്യ രാധിക ഓസ്വാളും. 'വില്ല വാരി' എന്ന ആഡംബര ഭവനം സ്വിറ്റ്സര്‍ലാന്‍റിലാണ്

1649 കോടിയാണ് വില. ശാന്തമായ ഗ്രാമപ്രദേശത്ത് സ്ഥിതി ചെയ്യുന്ന ഈ സ്വപ്ന ഭവനം മോണ്ട് ബ്ലാങ്ക് പര്‍വതത്തിന്‍റെ സമീപത്താണ്.. മഞ്ഞ് മൂടിക്കിടക്കുന്ന മൗണ്ട് ബ്ളാങ്ക് പർവതത്താൽ ചുറ്റപ്പെട്ടതാണ് വില്ല വാരി. 4.3 ലക്ഷം ചതുരശ്ര അടി വിസ്തീര്‍ണമുള്ള ഈ വീട് അത്യാഢംബരത്തിന്റെ അവസാനവാക്കാണ്. ജനീവയായില്‍ നിന്ന് കേവലം 15 മിനുട്ട് കൊണ്ട് ഇവിടെയെത്താം.ലോകത്തിലെ ഏറ്റവും വിലയേറിയ വീടുകളുടെ ആദ്യ പത്തില്‍ വില്ല വാരിയും ഇടംപിടിച്ചിരുന്നു..കാന്റൺ ഓഫ് വോഡിലെ ഏറ്റവും വലിയ എസ്റ്റേറ്റ് എന്ന ബഹുമതി വില്ല വാരി സ്വന്തമാക്കിയിട്ടുണ്ട്.

ഓസ്‌വാള്‍ ഗ്രൂപ്പിന്റെ സ്ഥാപകനായ അഭയ് കുമാര്‍ അഗര്‍വാളിന്റെ മകനാണ് പങ്കജ്. 2016ല്‍ അഭയ്‌യുടെ മരണത്തിന് ശേഷമാണ് ബിസിനസിന്റെ തലപ്പത്തേക്ക് പങ്കജ് എത്തുന്നത്. പെട്രോകെമിക്കല്‍സ്, റിയല്‍ എസ്‌റ്റേറ്റ്, ഫെര്‍ട്ടിലൈസേഴ‌്‌സ്, മൈനിംഗ് എന്നീ മേഖലകളിലാണ് ഓസ്‌വാള്‍ ഗ്രൂപ്പിന്റെ പ്രാതിനിധ്യം.

പങ്കജും രാധികയും വാങ്ങുന്നതിന് മുമ്ബ് വില്ല വാരിയുടെ ഉടമസ്ഥ ക്രിസ്‌റ്റീന ഒനാസിസ് ആയിരുന്നു. വിഖ്യാത കപ്പല്‍ വ്യാപാരിയായ അരിസ്‌റ്റോറ്റില്‍ ഒനാസിസിന്റെ മകളാണ് ക്രിസ്‌റ്റീന. വീട് വാങ്ങിയതിന് ശേഷം വലിയ തരത്തിലുള്ള നവീകരണവും ഓസ്‌വാള്‍ കുടുംബം നടത്തി. ലോകപ്രശസ്ത ഇന്റീരിയര്‍ ഡിസൈനറായ ജെഫ്രി വിക്ക്‌സാണ് അതിന്റെ മേല്‍നോട്ടം വഹിച്ചത്. ലോകത്തിന്റെ വിവിധ ഭാഗങ്ങളില്‍ നിന്നുള്ള ഫര്‍ണിച്ചറുകളാലാണ് വില്ല വാരി അലങ്കരിക്കപ്പെട്ടിട്ടുള്ളത്.