കേന്ദ്ര പട്ടികയില്‍ വരുന്ന പൗരത്വ നിയമം നടപ്പാക്കാതിരിക്കാന്‍ ഒരു സംസ്ഥാനങ്ങള്‍ക്കും കഴിയില്ലെന്ന് ഗവര്‍ണര്‍ ആരിഫ് മുഹമ്മദ് ഖാന്‍ വ്യക്തമാക്കിയിരിക്കുകയാണ്. ഭരണഘടനയുടെ 254-ാം വകുപ്പില്‍ പെടുന്ന നിയമം ആയതിനാല്‍ എത്ര എതിര്‍പ്പുണ്ടായാലും സംസ്ഥാനങ്ങള്‍ നടപ്പാക്കാന്‍ ബാധ്യസ്ഥരാണെന്നുമാണ് ഗവര്‍ണര്‍ വ്യക്തമാക്കുന്നത്.

അതേസമയം, പൗരത്വ നിയമത്തിനെതിരെ സുപ്രീംകോടതിയെ സമീപിച്ച പിണറായി സര്‍ക്കാരിനോട് ഗവര്‍ണര്‍ വിശദീകരണം തേടിയിരിക്കുകയാണ്. ചീഫ് സെക്രട്ടറിയോടാണ് രാജ്ഭവന്‍ വിശദീകരണം ആവശ്യപ്പെട്ടത്. തന്നോട് ആലോചിക്കാതെയാണ് സര്‍ക്കാര്‍ സിഎഎക്കെതിരെ സുപ്രീം കോടതിയെ സമീപിച്ചതെന്ന് ഗവര്‍ണര്‍ കഴിഞ്ഞ ദിവസം വ്യക്തമാക്കിയിരുന്നു. ഇതിന്റെ അടിസ്ഥാനത്തിലാണ് വിശദീകരണം തേടിയിരിക്കുന്നത്. റൂള്‍സ് ഓഫ് ബിസിനസിലെ 34(2)ലെ അഞ്ചാം വകുപ്പ് വായിച്ചാണ് ഗവര്‍ണര്‍ സര്‍ക്കാര്‍ നടപടിയെ എതിര്‍ത്തത്. കേന്ദ്ര, സംസ്ഥാന ബന്ധങ്ങളെ ബാധിക്കുന്ന വിഷയങ്ങളില്‍ ഗവര്‍ണറുടെ അനുമതി ആവശ്യമാണെന്ന് റൂള്‍സ് ഓഫ് ബിസിനസ് വ്യക്തമാക്കുന്നു.

അതേസമയം സര്‍ക്കാരുകളോട് ഓരോകാലത്തും പല സംഭവങ്ങളുടെയും പേരില്‍ ഗവര്‍ണര്‍മാര്‍ വിശദീകരണം തേടാറുണ്ടെങ്കിലും ഇത്ര കടുപ്പിച്ചും ഗുരുതര സാഹചര്യത്തിലും ഉള്ളത് സംസ്ഥാനത്ത് ഇതാദ്യത്തേതാണ്. രാജ്ഭവനും സര്‍ക്കാരും നേര്‍ക്കുനേര്‍ പോരാടുന്ന ഘട്ടമാണ് ഇപ്പോഴത്തേത്. അതുകൊണ്ടുതന്നെ ഇത്തവണ ഗവര്‍ണറുടെ വിശദീകരണംതേടലിനു ഗൗരവമേറെ.

കണ്ണൂരില്‍ രാഷ്ട്രീയ കൊലപാതകങ്ങള്‍ നടന്നപ്പോഴും ശബരിമല സമരത്തിന്റെ പേരില്‍ ഹര്‍ത്താലും അക്രമവും ഉണ്ടായപ്പോഴും അന്ന് ഗവര്‍ണറായിരുന്ന ജസ്റ്റിസ് പി. സദാശിവം സര്‍ക്കാരിനോട് റിപ്പോര്‍ട്ട് തേടിയിട്ടുണ്ട്. അപ്പോഴൊക്കെ മുഖ്യമന്ത്രി, ചീഫ് സെക്രട്ടറി, ഡി.ജി.പി. തുടങ്ങിയവരൊക്കെ രാജ്ഭവനിലെത്തി കാര്യങ്ങള്‍ വിശദീകരിച്ചിട്ടുമുണ്ട്. ചില ഘട്ടങ്ങളില്‍ ഡി.ജി.പി.മാരെ രാജ്ഭവനിലേക്കു വിളിച്ചുവരുത്തുകയും ചെയ്തിട്ടുണ്ട്. അന്നൊന്നും ഇപ്പോഴത്തേതിനു സമാനമായ സാഹചര്യമായിരുന്നില്ല. അന്നൊന്നും താക്കീതിന്റെയും സര്‍ക്കാരിനോട് ഇത്ര കടുത്ത അതൃപ്തിയുടെയും ധ്വനി ഗവര്‍ണറില്‍നിന്ന് ഉണ്ടായിരുന്നതുമില്ല.

സദാശിവത്തിനുമുമ്പും പല വിഷയങ്ങളിലും ഗവര്‍ണര്‍മാര്‍ സര്‍ക്കാരുകളോട് വിശദീകരണംതേടിയിട്ടുണ്ട്. മിക്കപ്പോഴും രാജ്ഭവനില്‍ കിട്ടുന്ന പരാതിയുടെ അടിസ്ഥാനത്തില്‍ക്കൂടിയാകും ഇത്. സര്‍ക്കാര്‍ അയക്കുന്ന ഓര്‍ഡിനന്‍സോ നിയമസഭ അംഗീകരിച്ച ബില്ലോ ഒപ്പിടാതെ വിശദീകരണമോ തിരുത്തലുകളോ ആവശ്യപ്പെട്ട് തിരിച്ചയക്കുന്നതും പതിവാണ്. തിരുത്തലും വ്യക്തതയും വരുത്തി വീണ്ടും സമര്‍പ്പിക്കുമ്പോള്‍ ഗവര്‍ണര്‍ ഒപ്പിടുകയും ചെയ്യും.

വി.സി.മാരുടെ നിയമനത്തിന് സര്‍ക്കാര്‍ നല്‍കുന്ന പട്ടികയില്‍ തിരുത്തല്‍ വരുത്തുകയും സിന്‍ഡിക്കേറ്റ് അംഗങ്ങളുടെ പേരുകള്‍ മാറ്റുന്നതുമൊക്കെ നടന്നിട്ടുണ്ട്. എന്നാല്‍, ഇത്തവണ സര്‍ക്കാര്‍ അംഗീകരിച്ച ഓര്‍ഡിനന്‍സ് ഒപ്പിടുകയോ തിരിച്ചയക്കുകയോ ചെയ്യാതെ, സുപ്രീംകോടതിയില്‍ താനറിയാതെ കേസിനു പോയതിനെതിരേ റൂള്‍സ് ഓഫ് ബിസിനസിലാണ് ഗവര്‍ണര്‍ പിടിമുറുക്കിയത്. അതും രാജ്ഭവന്‍സര്‍ക്കാര്‍ ബന്ധം അത്യന്തം വഷളയായ ഘട്ടത്തിലും. ഈ ഭിന്നതയാണ് സര്‍ക്കാരിനു മുന്നിലെ പ്രതിസന്ധി. പ്രത്യേകിച്ച് നിയമസഭയില്‍ ഗവര്‍ണറുടെ നയപ്രഖ്യാപനം അടുത്തിരിക്കെ.

ഭരണഘടനപ്രകാരം എല്ലാ എം.എല്‍.എ.മാരും ഗവര്‍ണറും ചേരുന്നതാണ് നിയമസഭ. അതിനാല്‍ സഭയില്‍ നടക്കുന്ന കാര്യങ്ങളറിയണം എന്നാണ് ഗവര്‍ണറുടെ വാദം. കേന്ദ്ര, സംസ്ഥാന സര്‍ക്കാരുകള്‍ക്കിടയിലെ പാലമായാണ് ഗവര്‍ണറെ കാണുന്നത്. കേന്ദ്രസംസ്ഥാന ഏറ്റുമുട്ടലുണ്ടായാല്‍ ഗവര്‍ണറുടെ നിലപാട്, നിഷ്പക്ഷത എന്നിവയാണ് എല്ലാവരും ഉറ്റുനോക്കുന്നതും. ഇനിയങ്ങോട്ട് ഗവര്‍ണറില്‍നിന്ന് അനുകൂല സമീപനം സര്‍ക്കാരും പ്രതീക്ഷിക്കുന്നില്ല.