സൗദിയിൽ നിത്യേന ഉപയോഗിക്കുന്ന ഭക്ഷ്യവസ്ത്തുക്കൾക്ക് വിലവർദ്ധിക്കുന്നത് സാധാരക്കാരായ പ്രവാസികൾക്ക് വലിയ സാമ്പത്തിക പ്രതിസന്ധിയാണ് ഉണ്ടാക്കുന്നത്. സൗദിയിൽ കോഴിമുട്ടയുടെ വിലയിലും വര്‍ധനവ് തുടരുകയാണ്. ഇതിന് പിന്നാലെ ഇപ്പോൾ ഇതാ പൊടുന്നനെ സൗദിയിൽ പാലുൽപന്നങ്ങൾക്ക് വില കൂട്ടിയിരിക്കുകയാണ്. പുതുവത്സര ദിനത്തിൽ യാതൊരു മുന്നറിയിപ്പുമില്ലാതെയാണ് കമ്പനികൾ ഇത്തരത്തിൽ വില കൂട്ടിയത്.

ഉത്പാദന ചിലവ് വർധിച്ചതാണ് പെട്ടെന്ന് വില വർധിപ്പിക്കാൻ ഇടയാക്കിയതെന്ന് പ്രമുഖ ക്ഷീര കമ്പനിയായ മൽമറാഇ വിശദീകരിച്ചു. ഉൽപന്നങ്ങളുടെ ചിലവ്, കാലിത്തീറ്റയുടെ വിലവർധനവ്, ഗതാഗത മേഖലയിൽ ഡീസലിനുൾപ്പെടെയുണ്ടായ വിലവർധനവ് എന്നിവ പാലുൽപന്നങ്ങളുടെ വിലവർധനവിന് കാരണമായതായി ഉൽപാദക കമ്പനികൾ പറയുന്നു. പാലിന് പുറമേ കമ്പനികളുടെ മറ്റുൽപന്നങ്ങൾക്കും വില വർധിപ്പിച്ചിരിക്കുകയാണ്. സൗദിയില്‍ കോഴിമുട്ടയുടെ വിലയും അനിയന്ത്രിതമായി വര്‍ധിക്കുകയാണ്.

അതേസമയം, കൃത്രിമ വിലക്കറ്റം തടയുന്നതിന് വിപണി നിരീക്ഷണം ശക്തമാക്കിയതായി വാണിജ്യ മന്ത്രാലയം അറിയിച്ചു. ഓണ്‍ലൈന്‍ നിരീക്ഷണ സംവിധാനം കാര്യക്ഷമമായി പ്രവര്‍ത്തിക്കുന്നുണ്ടെന്നും പൂഴ്ത്തിവെപ്പും കരിഞ്ചന്തയും കര്‍ശനമായി നിരീക്ഷിക്കുന്നുണ്ടെന്നും അധികൃതര്‍ അറിയിച്ചു.

ജനറല്‍ അതോറിറ്റി ഫോര്‍ കോംപറ്റീഷനുമായി സഹകരിച്ച് പൂഴ്ത്തിവയ്പ്പും കരിഞ്ചന്തയും തടയാന്‍ പരിശോധന ശക്തമാക്കിയിട്ടുണ്ട്. പ്രാദേശിക കമ്പോളത്തിലെ 280 അവശ്യവസ്തുക്കളുടെ വില സ്ഥിരമായി വിലയിരുത്തി അയല്‍ രാജ്യങ്ങളിലെ വിലയും സൗദി അറേബ്യയിലെ വിലയും തമ്മില്‍ താരതമ്യം ചെയ്യുന്നുണ്ടെന്നും മന്ത്രാലയം അറിയിച്ചു.