പീഡനകഥകൾ തുടർകഥയാകുന്ന സാഹചര്യത്തിൽ തിരുവന്തപുരത്തുനിന്ന് ഇപ്പോൾ പുറത്ത് വരുന്നത് ഞെട്ടിക്കുന്ന പീഡന വാർത്തയാണ്. വിവാഹവാഗ്ദാനം നൽകി ചിറക്കുളം സ്വദേശിയായ വീട്ടമ്മയെ പീഡിപ്പിക്കുകയും ഇവരുടെ പ്രായപൂർത്തിയാകാത്ത പെൺമക്കളെ ലൈംഗിക ചൂഷണത്തിനിരയാക്കുകയും ചെയ്ത യുവാവ് പിടിയിൽ.

വഞ്ചിയൂർ പാ​റ്റൂർ റോഡിൽ ​ടി.സി 27/1224, വയൽ നികത്തിയ പുരയിടം വീട്ടിൽ പ്രവീൺകുമാർ (കുഞ്ഞുമോൻ-31) ആണ് അറസ്​റ്റിലായത്. വീട്ടമ്മയുടെ സ്വർണാഭരണങ്ങളും ഇയാൾ തട്ടിയെടുത്തു.

യുവതിയുടെ പരാതിയിൽ വഞ്ചിയൂർ പൊലീസ് രജിസ്റ്റർ ചെയ്ത കേസിലാണ് അറസ്റ്റ്. ഇവരുടെ പത്തും പന്ത്രണ്ടും വയസുള്ള മക്കൾ ചൈൽഡ് ലൈനിൽ പരാതി നൽകിയിരുന്നു. ഇവരുടെ മൊഴിപ്രകാരം പ്രവീണിനെതിരെ പോക്സോ നിയമ പ്രകാരം കേസെടുത്തിരുന്നു. ഇതേത്തുടർന്ന് പ്രവീൺ തമിഴ്നാട്ടിൽ ഒളിവിലായിരുന്നു.

മൊബൈൽ ടവർ കേന്ദ്രീകരിച്ച് നടത്തിയ അന്വേഷണത്തിൽ തമിഴ്നാട്ടിൽ നിന്ന് ഇയാളെ പിടികൂടുകയായിരുന്നു. ശംഖുംമുഖം അസി. കമ്മിഷണർ ഷാനിഹാൻ, പേട്ട സി.ഐ സുരേഷ് വി.നായർ, വഞ്ചിയൂർ എസ്.ഐ അശോക് കുമാർ, എസ്.സി.പി.ഒ രാജേഷ് എന്നിവർ ഉൾപ്പെട്ട സംഘമാണ് പ്രതിയെ അറസ്​റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.