ബലാത്സംഗ കേസിലെ ഗൂഢാലോചനയില്‍ പ്രതി ചേര്‍ക്കപ്പെട്ട് ജയിലില്‍ കഴിയുന്ന ദിലീപിനെ സന്ദര്‍ശിച്ച് ഓണക്കോടി സമ്മാനിച്ച ജയറാമിന്റെ നടപടിയെ വിമര്‍ശിച്ച് സിനിമാ ലോകവും. പ്രശസ്ത സിനിമാ പത്ര പ്രവര്‍ത്തകനായ ജോസ് പല്ലിശേരി ചാനല്‍ ചര്‍ച്ചയ്ക്കിടെയാണ് ജയറാമിനെതിരെ രൂക്ഷ വിമര്‍ശനം നടത്തിയിരിക്കുന്നത്. ഇരയ്‌ക്കൊപ്പമാണോ നില്‍ക്കുക വേട്ടക്കാരനൊപ്പമാണോ നില്‍ക്കുക എന്ന സാമാന്യ നീതിക്ക് നിരക്കാത്ത കാര്യമാണ് സിനിമാക്കാര്‍ നില്‍ക്കുന്നത്. പണവും പ്രതാപവുമുള്ള ദിലീപിന് കുറ്റത്തില്‍ പങ്കുണ്ടെന്ന് അങ്കമാലി മജ്‌സ്‌ട്രേറ്റ് കോടതിയും ഹൈക്കോടതിയും രണ്ട് തവണ വീതം കണ്ടെത്തിയാണ് ജാമ്യം നിഷേധിച്ചത്. അപ്പോഴും ഗണേഷ് കുമാര്‍ ഉള്‍പ്പെടെയുള്ളവര്‍ പറയുന്നത് പോലീസ് ഗൂഢാലോചന നടത്തി ദിലീപിനെ അകത്താക്കിയെന്നാണ്.

തിരുവോണ നാളിലാണ് ജയറാം ജയിലിലെത്തി ഓണക്കോടി ദിലീപിന് സമ്മാനിച്ചത്. വര്‍ഷങ്ങളായി തുടരുന്ന ബന്ധമാണിതെന്നാണ് ജയറാം പറയുന്നത്. ദിലീപിനെ സിനിമയില്‍ കൊണ്ടുവരാന്‍ ശ്രമിച്ചയാളാണ്. അതേസമയം ദിലീപിനെ അറസ്റ്റ് ചെയ്യുന്ന സമയത്ത് ജയറാം പറഞ്ഞത് ഇത്തരമൊരു പ്രവൃത്തി ദിലീപില്‍ നിന്ന് പ്രതീക്ഷിച്ചിരുന്നില്ല എന്നാണ്. കടുത്ത വിഷമമാണ് ഈ കാര്യത്തിലുണ്ടായതെന്നും ജയറാം പറഞ്ഞു.

കലാഭവന്റെ മുന്നില്‍ നിന്നും 33 വര്‍ഷം മുമ്പ് തുടങ്ങിയ ബന്ധമാണ് ദിലീപുമായി ഉള്ളതെന്ന് വ്യക്തമാക്കിയ ജയറാം മറ്റാരെക്കാളും ബന്ധം അദ്ദേഹവുമായി ഉണ്ടായിരുന്നെന്നും പറഞ്ഞു.

അതേസമയം നടിയുമായി ഏറെ ആത്മബന്ധം പുലര്‍ത്തിയിരുന്ന ആളാണ് ജയറാം. ഹാപ്പി ഹസ്ബന്റ്, ഇവര്‍, കുടുംബശ്രീ ട്രാവല്‍സ്, ട്വന്റി ട്വന്റി, അമൃതം എന്നീ ചിത്രങ്ങളില്‍ ഒരുമിച്ചഭിനയിച്ചിട്ടുണ്ട്. എന്നാല്‍ ദിലീപുമായിട്ട് ചൈന ടൗണ്‍, ക്രിസ്ത്യന്‍ ബ്രദേഴ്‌സ് തുടങ്ങിയ വിരലിലെണ്ണാവുന്ന ചിത്രങ്ങളില്‍ മാത്രമാണ് ജയറാം ഒന്നിച്ചഭിനയിച്ചത്.

ഇത്രയേറെ ആത്മബന്ധം പുലര്‍ത്തുന്ന ജയറാം എന്തുകൊണ്ട് ആ നടിയെ ആശ്വസിപ്പിക്കാന്‍ അവരുടെ വീട്ടില്‍ പോയില്ല. ഓണക്കോടി നല്‍കിയില്ല. കാരണം വളരെ ലളിതം. ആ നടിയെ ആശ്വസിപ്പിച്ചിട്ട് ഒരു കാര്യവുമില്ലല്ലോ. ഒരു നേട്ടവും കിട്ടില്ല. ദിലീപിനെ കണ്ടാല്‍ പലതുണ്ട് നേട്ടം. മലയാള സിനിമയെ നിയന്ത്രിക്കുന്ന ദിലീപിന്റെ പ്രീതി ജയറാമിന് ഏറെ ആവശ്യമാണ്. ദിലീപിനെ വെറുപ്പിച്ചിട്ട് ഔട്ടായി കൊണ്ടിരിക്കുന്ന ജയറാമിന് പിടിച്ച് നില്‍ക്കാന്‍ സാധിക്കില്ല. മാത്രമല്ല മകന്‍ കാളിദാസന്‍ നായക നിരയില്‍ പിച്ചവച്ചിട്ടേയുള്ളൂ. സന്തോഷമുള്ള ദിലീപിനേക്കാള്‍ സങ്കടമുള്ള ദിലീപിനെ കണ്ടിട്ടേ കാര്യമുള്ളൂ.

ആ നടിയെ ആക്രമിച്ച ഗൂഢാലചനക്കേസില്‍ പ്രതി ചേര്‍ക്കപ്പെട്ട ആളെ കാണുന്ന കൂട്ടത്തില്‍ ഒന്ന് അവിടംവരേയും പോകമായിരുന്നു. അപ്പോള്‍ തന്നെ മറന്ന് ആ ഗൂഢാലോചനക്കാരനൊപ്പമാണെന്ന് കൂടെപ്പിറപ്പെന്നു കരുതുന്നവര്‍ പറയുന്നതാണ് അവരെ കൂടുതല്‍ വേദനിപ്പിക്കുന്നത്.

എല്ലാം തകര്‍ന്ന് ഓണം പോലും ആഘോഷിക്കാന്‍ കഴിയാത്ത മാനസികാവസ്ഥയിലിരുന്നു നടിക്കും കൊടുക്കാമായിരുന്നു ഒരോണപ്പുടവ.