ജനങ്ങളുടെ പോക്കറ്റ് കാലിയാക്കി മുന്നേറുന്ന ജിഎസ്ടി നിരക്കുകളില്‍ നേരിയ ആശ്വാസം. വറുത്ത കടല, ദോശ മാവ്, പിണ്ണാക്ക്, മഴക്കോട്ട്, റബര്‍ ബാന്‍ഡ് തുടങ്ങി 30 ഇനങ്ങളുടെ ജിഎസ്ടി നിരക്കിലാണ് കുറവ് വന്നിരിക്കുന്നത്. 
ധനമന്ത്രി അരുണ്‍ ജയ്റ്റിലി ഹൈദരാബാദില്‍ നടന്ന ജിഎസ്ടി കൗണ്‍സില്‍ യോഗത്തിനു ശേഷമാണ് ഇത് അറിയിച്ചിരിക്കുന്നത്. ജിഎസ്ടി റിട്ടേണ്‍സ് സമര്‍പ്പിക്കാനുള്ള അവസാന തീയതി ഒക്ടോബര്‍ 10 വരെ ദീര്‍ഘിപ്പിച്ചു. വരുന്ന ഞായറാഴ്ചയായിരുന്നു റിട്ടേണ്‍സ് സമര്‍പ്പിക്കാനുള്ള അവസാന തീയതി. ഇതാണ് ദീര്‍ഘിപ്പിച്ച് നല്‍കിയത്. രജിസ്‌റ്റേര്‍ഡ് ട്രേഡ്മാര്‍ക്കുള്ള സ്ഥാപനങ്ങളുടെ ഉത്പന്നങ്ങള്‍ക്ക് അഞ്ച് ശതമാനം ജിഎസ്ടി ഏര്‍പ്പെടുത്തി. മെയ് 15 വരെ ട്രേഡ്മാര്‍ക്ക് രജിസ്റ്റര്‍ ചെയ്തവര്‍ക്ക് ഇത് ബാധകമാണ്. 
വലിയ കാറുകള്‍ക്ക് 5 ശതമാനം അധിക സെസ് ഏര്‍പ്പെടുത്താനും ജിഎസ്ടി കൗണ്‍സില്‍ തീരുമാനിച്ചു. ഇടത്തരം വലിപ്പമുള്ള കാറുകള്‍ക്ക് 2 ശതമാനവും എസ്യുവികളുടെ സെസില്‍ 7 ശതമാനവും വര്‍ധന വരുത്തി. കെവിഐസി വില്‍ക്കുന്ന ഖാദിക്ക് ജിഎസ്ടി ഒഴിവാക്കാനും യോഗത്തില്‍ തീരുമാനമായിട്ടുണ്ട്.