നടി ആക്രമിക്കപ്പെട്ട കേസില്‍ അറസ്റ്റിലായ നടന്‍ ദിലീപിനെ പിന്തുണച്ച പിസി ജോര്‍ജ് സ്വന്തം നിലപാടില്‍ തന്നെ ഉറച്ചു നില്‍ക്കുകയാണ്. ദിലീപ് നിരപരാധിയാണെന്നതിന് നിരവധി തെളിവുകള്‍ തന്റെ പക്കലുണ്ടെന്ന് പിസി ജോര്‍ജ് വ്യക്തമാക്കി. ഒരു മാധ്യമത്തിന് നല്‍കിയ അഭിമുഖത്തിലാണ് തന്റെ നിലപാടുകള്‍ കൂടുതല്‍ ശക്തമായി പിസി വീണ്ടും ഉന്നയിച്ചത്.

നടി ആക്രമിക്കപ്പെട്ട കേസില്‍ ദിലീപിനെ പൊലീസ് മനപ്പൂര്‍വ്വം വേട്ടയാടുകയാണെന്ന് ഉറപ്പിച്ചു പറയും. ഇതിന്റെ പേരില്‍ ദിലീപുമായി ബന്ധമുണ്ടെന്ന് പറയുന്നത് തെറ്റാണ്. ദിലീപുമായി യാതൊരു തരത്തിലുള്ള ബന്ധങ്ങളുമില്ലെന്നും പിസി പറഞ്ഞു.

നടിയുടെ പേര് പറയരുതെന്ന് കോടതി പറഞ്ഞു. എന്നാല്‍ ഏപ്രില്‍ ഒന്നിന് ഒരു മാഗസിന്റെ കവര്‍ സ്‌റ്റോറിയില്‍ വന്ന നടി സ്വയം ഇര താന്‍ തന്നെയാണെന്ന് പറഞ്ഞു. പീഡനത്തില്‍ തനിക്കുണ്ടായ വേദനകളെക്കുറിച്ചും പറയുന്നുണ്ടായിരുന്നുവെന്നും പിസി പറഞ്ഞു. തനിക്കെതിരെ ആരോപണങ്ങളുന്നയിച്ച പിസിക്കെതിരെ നടി കഴിഞ്ഞ ദിവസം ആലുവ പൊലീസില്‍ പരാതി നല്‍കിയിരുന്നു.

വാര്‍ത്താ മാധ്യമങ്ങളിലൂടെയും ചാനല്‍ചര്‍ച്ചകളിലൂടെയും പിസി ജോര്‍ജ്ജ് അപകീര്‍ത്തിപ്പെടുത്തുന്ന പ്രസ്താവനകള്‍ നടത്തിയെന്ന പരാതിയിലാണ് നടിയുടെ മൊഴി പൊലീസ് രേഖപ്പെടുത്തിയത്. പിസി ജോര്‍ജ്ജ് നിരന്തരം തനിക്ക് മാനഹാനിയുണ്ടാക്കുന്ന രീതിയില്‍ പ്രസ്താവനകള്‍ നടത്തുന്നു എന്ന് ചൂണ്ടിക്കാട്ടി മുഖ്യമന്ത്രിക്ക് നടി നല്‍കിയ പരാതിയുടെ അടിസ്ഥാനത്തില്‍ നെടുമ്ബാശ്ശേരി പൊലീസാണ് കേസെടുത്തത്. അക്രമത്തെ അതിജീവിച്ച നടിയ്‌ക്കെതിരെ പ്രസ്താവന നടത്തിയ പിസിക്കെതിരെ വനിത കമ്മീഷന്‍ സ്വമേധയാ കേസെടുത്തിരുന്നു.