നാദിർഷായെ പോലീസ് ഉടൻ അറസ്റ്റ് ചെയ്തേക്കും. ഹൈക്കോടതിയിൽ അദ്ദേഹം മുൻകൂർ ജാമ്യഹർജി ഫയൽ ചെയ്തിട്ടുണ്ടെങ്കിലും അത് അനുവദിക്കാനുള്ള സാധ്യത വിരളമാണ്. തന്നെ അറസ്റ്റ് ചെയാൻ സാധ്യതയുണ്ടെന്ന കാര്യം നാദിർഷാക്ക് കോടതിയെ ബോധ്യപ്പെടുത്താൻ കഴിഞ്ഞെന്ന് വരില്ല. അതിനിടെ ദിലീപ് വിഷയത്തിൽ മാപ്പുസാക്ഷിയാകണമെന്ന പോലീസിന്റെ ആവശ്യം അംഗീകരിക്കാത്തതാണ് നാദിർഷാക്ക് വിനയായതെന്നും അറിയുന്നു. നാദിർഷായും ദിലീപും തമ്മിലുള്ളത് ആത്മബന്ധമാണ്. ദിലീപിന്റെ ജീവിതത്തെ കുറിച്ച് എല്ലാം നാദിർഷാക്കറിയാം. എന്നാൽ ദിലീപിന്റെ ദോഷ കാലത്ത് അദ്ദേഹത്തിനെതിരെ നിലപാട് എടുക്കാൻ നാദിർഷാ തയ്യാറല്ല. കാരണം നാദിർഷായുടെ ജീവിതം ദിലീപിനോട് കടപ്പെട്ടിരിക്കുന്നു.

ദിലീപ് വിഷയത്തിൽ നാദിർഷായെ മാപ്പുസാക്ഷിയാക്കാൻ വൻ സമ്മർദ്ദമുണ്ടായിരുന്നു. അദ്ദേഹത്തെ പല തരത്തിൽ സ്വാധീനിക്കാൻ പോലീസ് ശ്രമിച്ചിരുന്നു. എന്നാൽ നടി ആക്രമിക്കപ്പെട്ട സംഭവത്തിൽ ദിലീപിൽ നിന്നും ആഗ്രഹിച്ചതൊന്നും ലഭിക്കാതെ വന്നപ്പോഴാണ് അറസ്റ്റിലേക്ക് നീങ്ങിയത്. എന്നാൽ അറസ്റ്റ് ചെയ്താലും ഇല്ലാത്തതൊന്നും പറയില്ലെന്ന നിലപാടിലാണ് നാദിർഷാ. ഉദരരോഗമാണെന്ന് പറഞ്ഞാണ് നാദിർഷാ ആശുപത്രിയിൽ പ്രവേശിച്ചത്. എന്നാൽ അത് അറസ്റ്റിൽ നിന്നും ഒളിച്ചോടാനുള്ള തന്ത്രമാണെന്ന് പോലീസ് പറയുന്നു. ആശുപത്രിയിൽ കിടന്നാൽ അവിടെ നിന്നും അറസ്റ്റ് ചെയ്യും എന്ന സൂചന ലഭിച്ചപ്പോഴാണ് നാദിർഷാ ആശുപത്രി വിട്ടത്.

അറസ്റ്റുണ്ടാകുമെന്ന കണക്കുകൂട്ടലിൽ തന്നെയാണ് നാദിർഷാ. അടുത്ത സുഹ്യത്തുക്കളോട് ഇതു സംബന്ധിച്ച് സൂചനകൾ നൽകിക്കഴിഞ്ഞു. അറസ്റ്റുണ്ടായാൽ ജാമ്യം ലഭിക്കുമോ എന്ന കാര്യത്തിലും അശങ്കയുണ്ട്. ബുധനാഴ്ച വരെ അറസ്റ്റ് ഉണ്ടാകരുതെന്നാണ് നാദിർഷായുടെ പ്രാർത്ഥന. ഹൈക്കോടതി ഉത്തരവിൽ പ്രതീക്ഷയർപ്പിക്കുകയാണ് അദ്ദേഹം. അത് എതിരായാൽ നാദിർഷാ എന്തും പ്രതീക്ഷിക്കുന്നു.