കുമ്മനം വീണ്ടും ട്രോളുകളില്‍ നിറയുന്നു. കൊച്ചി മെട്രോ ട്രെയിനിന്റെ കന്നിയാത്രയില്‍ പ്രധാനമന്ത്രിയ്ക്കും മുഖ്യമന്ത്രിയ്ക്കും മറ്റ് പ്രമുഖര്‍ക്കുമൊപ്പം ക്ഷണിക്കപ്പെടാത്ത അതിഥിയായി ബി.ജെ.പി സംസ്ഥാന അധ്യക്ഷന്‍ കുമ്മനം രാജശേഖരനും കയറിപ്പറ്റിയതോടെയാണ് കുമ്മനടി എന്ന വാക്ക് രൂപപ്പെട്ടത്. പിന്നീട് സോഷ്യല്‍ മീഡിയ കുമ്മനം രാജശേഖരനെ ട്രോളിക്കൊന്നിരുന്നു. എന്നാല്‍ വീണ്ടും ഇത്തരത്തില്‍ ഒരു സംഭവം കുമ്മനം ആവര്‍ത്തിച്ചിരിക്കുകയാണ്.

കേന്ദ്ര ടൂറിസം മന്ത്രിയായി ചുമതലയേറ്റ അല്‍ഫോണ്‍സ് കണ്ണന്താനത്തിന് ജന്മനാട്ടില്‍ നല്‍കിയ സ്വീകരണത്തില്‍ അദ്ദേഹത്തെ പൂമാലയിട്ട് പ്രവര്‍ത്തകര്‍ സ്വീകരിച്ചപ്പോള്‍ കുമ്മനം പൂമാലയ്ക്കുള്ളില്‍ കയറിക്കൂടുകയായിരുന്നു. ഇതോടെ സോഷ്യല്‍ മീഡിയയില്‍ ട്രോളുകളുടെ പ്രവാഹമാണ്.

കുമ്മനടിക്കുക എന്നത് മലയാള ഭാഷയില്‍ ഉറപ്പിച്ചേ അടങ്ങൂ ഇദ്ദേഹം എന്നുപറഞ്ഞുകൊണ്ടാണ് ചിത്രം പലരും ഷെയര്‍ ചെയ്യുന്നത്. ബി.ജെ.പി സംസ്ഥാന നേതാക്കളുടെ പ്രതീക്ഷയ്ക്ക് വിഭിന്നമായി അല്‍ഫോണ്‍സ് കണ്ണന്താനത്തെ കേന്ദ്രമന്ത്രി ആക്കിയതില്‍ സംസ്ഥാന നേതാക്കള്‍ക്ക് അതൃപ്തിയുണ്ടായിരുന്നു.

ഇതേത്തുടര്‍ന്ന് കണ്ണന്താനം സത്യപ്രതിജ്ഞ ചെയ്യുന്ന ദിവസം ബിജെപി ഓഫീസുകളില്‍ ആഘോഷ പരിപാടികള്‍ ഒന്നും തന്നെ ഇല്ലായിരുന്നു. കേന്ദ്രനേതൃത്വത്തിന്റെ ഇടപെടല്‍ ഉണ്ടായതിന് പിന്നാലെയായിരുന്നു കണ്ണന്താനത്തിന് സ്വീകരണം നല്‍കാന്‍ സംസ്ഥാന ബി.ജെ.പി നേതൃത്വം തയ്യാറായത്.

അല്‍ഫോണ്‍സ് കണ്ണന്താനം കേന്ദ്രമന്ത്രിയായതിന് വരെ സോഷ്യല്‍ മീഡിയയില്‍ ട്രോള്‍ ഉണ്ടായിരുന്നു. സാക്ഷാല്‍ കുമ്മനം രാജശേഖരനെ പോലും കുമ്മനടിച്ചാണ് കണ്ണന്താനം കേന്ദ്രമന്ത്രിയായത് എന്നായിരുന്നു ട്രോളുകള്‍.

അതിനിടെ കണ്ണന്താനം ജന്മനാട്ടിലേക്ക് പോകുംവഴി കൂരാലിയില്‍ ബി. ജെ. പി പ്രവര്‍ത്തകരുടെ സ്വീകരണത്തിന് ഇറങ്ങിയപ്പോള്‍ പഴയ സി. പി. എം സഹപ്രവര്‍ത്തകനെ വഴിയില്‍ കണ്ട് ലോക്കല്‍ കമ്മിറ്റി ഓഫീസിലേക്ക് ഓടി കയറി. കൂടെയുണ്ടായിരുന്ന കുമ്മനം രാജശേഖരനെയും മറ്റും ഞെട്ടിച്ചാണ് കണ്ണന്താനം അപ്രതീക്ഷിത സന്ദര്‍ശനം സിപിഎം ഓഫീസില്‍ നടത്തിയത്. ഇതും നേതാക്കളുടെ മുറുമുറുപ്പിന് ഇടയാക്കി.

കാഞ്ഞിരപ്പള്ളി എം. എല്‍. എ.ആയിരുന്നപ്പോള്‍ എലിക്കുളത്ത് ഒപ്പം പ്രവര്‍ത്തിച്ചിരുന്ന സി. പി. എം ലോക്കല്‍ സെക്രട്ടറി എസ്. ഷാജി പാര്‍ട്ടി ഓഫീസിനു മുമ്പില്‍ നില്‍ക്കുന്നത് കണ്ടാണ് കണ്ണന്താനം അവിടേക്കെത്തിയത്. ഷാജിയെ കെട്ടിപ്പിടിച്ച് കണ്ണന്താനം പാര്‍ട്ടി ഓഫീസിനുള്ളില്‍ കയറി എല്ലാവരെയും കണ്ടു സന്തോഷംപങ്കുവച്ചാണു മടങ്ങിയത്.