ഗതാഗത മന്ത്രി തോമസ്ചാണ്ടിയുടെ രാജിയ്ക്കായി കേരളത്തിൽ അങ്ങോളമിങ്ങോളം പ്രതിഷേധം നടക്കുമ്പോൾ തലസ്ഥാനത്ത് തിരക്കിട്ട രാഷ്ട്രീയ ചർച്ച പുരോഗമിക്കുന്നു. ചാനലുകളുടെയും പത്രക്കാരുടെയും വമ്പൻ പടയാണ് തിരുവനന്തപുരം എ.കെ.ജി സെന്ററിനിന് മുന്നിൽ തമ്പടിച്ചിരിക്കുന്നത്. അതെ സമയം ഇടതുമുന്നണി യോഗം ചേരാനിരിക്കെ മനത്രി തോമസ് ചാണ്ടിയുടെ വിഷയം സംബന്ധിച്ച് തലസ്ഥാനത്ത് നേതാക്കൾ തിരക്കിട്ട കൂടിയാലോചനകൾ നടത്തുകയാണ്.

മുഖ്യമന്ത്രി പിണറായി വിജയനും സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനും തമ്മിൽ രാവിലെ എ.കെ.ജി സെന്ററിൽ ചർച്ച നടത്തി. പിന്നീട്,​ സി.പി.ഐ സംസ്ഥാന സെക്രട്ടറി കാനം രാജേന്ദ്രനേയും വിളിച്ചു വരുത്തി. തോമസ് ചാണ്ടി രാജി വയ്ക്കണമെന്ന നിലപാട് കാനം രാജേന്ദ്രൻ പിണറായിയേയും കോടിയേരിയേയും അറിയിച്ചിട്ടുണ്ട്.

ചാണ്ടി രാജിവയ്ക്കണമെന്ന അഭിപ്രായമാണ് കഴിഞ്ഞ ദിവസം സി.പി.എം സംസ്ഥാന സമിതി യോഗത്തിലും ഉണ്ടായത്. അതേസമയം,​ തോമസ് ചാണ്ടി രാജിവയ്ക്കേണ്ടതില്ലെന്ന നിലപാടിലാണ് എൻ.സി.പി. രാജിയുടെ സാഹചര്യം ഇപ്പോഴില്ലെന്നും കോടതിയുടെ തീരുമാനത്തിന് ശേഷം മതി രാജിക്കാര്യം ചർച്ച ചെയ്യുന്നതെന്നുമാണ് നേതാക്കളുടെ നിലപാട്. ഇക്കാര്യം ഇന്ന് ഇടതുമുന്നണി യോഗത്തിൽ എൻ.സി.പി അറിയിക്കും.