നമ്മുടെ നാട്ടിലൊക്കെ പത്താം ക്ലാസിലെ പരീക്ഷയിൽ നല്ല മാർക്ക് വാങ്ങിയാൽ എന്തായിരിക്കും സമ്മാനം? ഒരു പുതിയ സൈക്കിൾ, മൊബൈൽ ഫോൺ, അല്ലെങ്കിൽ ഇഷ്ടപ്പെട്ട മറ്റെന്തെങ്കിലും. എന്നാൽ പശ്ചിമ ബംഗാളിൽ ഒമ്പതാം ക്ലാസുകാരനായ ഒരു പതിനഞ്ചുകാരന് അച്ഛൻ നൽകിയ സമ്മാനം കേട്ടാൽ ആരും ഒന്ന് ഞെട്ടും! ഒൻപതാം ക്ലാസിലെ ഹാഫ് ഇയർലി പരീക്ഷയിൽ മികച്ച വിജയം നേടിയതിന് മകന് സമ്മാനിച്ചത് രണ്ടുകോടി മുപ്പത് ലക്ഷം രൂപ വിലയുള്ള ആഡംബര ബിഎംഡബ്ല്യു കാർ! അതും സാധാരണ കാറല്ല, BMW M4 Competition! പരീക്ഷ കഴിഞ്ഞപ്പോൾ സമ്മാനം കിട്ടിയത് ഒരു കാറാണെങ്കിൽ, ഇനി ഫൈനൽ പരീക്ഷയിൽ എന്തായിരിക്കും കിട്ടുക എന്നാണ് സോഷ്യൽ മീഡിയയിലെ രസകരമായ ചോദ്യം!

പശ്ചിമ ബംഗാളിലെ പൂർവ ബർധമാൻ ജില്ലയിലെ ഗൽസി പ്രദേശത്താണ് സംഭവം. അവിടെയുള്ള പരാജ് ഗ്രാമത്തിലെ വ്യവസായിയായ ഷംസുദ്ദീൻ മിദ്യയാണ് മകൻ മുഹമ്മദ് തൽഹയ്ക്ക് ഈ അത്യാഡംബര സമ്മാനം നൽകിയത്. പതിനഞ്ചുകാരനായ തൽഹ പ്രാദേശിക സ്കൂളിൽ ഒൻപതാം ക്ലാസിലാണ് പഠിക്കുന്നത്. കാറുകളോട് ചെറുപ്പം മുതലേ വലിയ കമ്പമുള്ള തൽഹയുടെ ഏറെ നാളായുള്ള ആഗ്രഹമായിരുന്നു ഒരു BMW M4 Competition സ്വന്തമാക്കുക എന്നത്. ഹാഫ് ഇയർലി പരീക്ഷയിൽ മികച്ച മാർക്ക് നേടിയതോടെ മകന്റെ ആഗ്രഹം സാധിച്ചുകൊടുക്കാൻ അച്ഛൻ തീരുമാനിച്ചു. പിന്നെ ഒട്ടും വൈകിയില്ല. മകനെയും കൂട്ടി മുംബൈയിലെത്തി കാർ വാങ്ങി. ഏകദേശം 2.30 കോടി രൂപയാണ് ഇതിനായി ചെലവിട്ടത്. കാറിന്റെ നിറം പോലും മകന്റെ ഇഷ്ടപ്രകാരമാണ് തിരഞ്ഞെടുത്തത്. പ്രത്യേക കണ്ടെയ്നറിൽ വീട്ടിലെത്തിച്ചാണ് ഈ സർപ്രൈസ് സമ്മാനം കൈമാറിയത്.

എന്നാൽ ഈ കഥയിലെ ഏറ്റവും കൗതുകകരമായ കാര്യം ആ കാർ മാത്രമല്ല. മകന്റെ ആഗ്രഹം സാധിച്ചുകൊടുത്ത പിതാവിന്റെ ജീവിതയാത്ര കൂടിയാണ്. ഇന്ന് കോടികളുടെ ബിസിനസ് നടത്തുന്ന ഷംസുദ്ദീന്റെ തുടക്കം അത്ര ആഡംബരത്തിലായിരുന്നില്ല. ജീവിതത്തിൽ വലിയ ഉയരങ്ങളിലെത്താൻ ഏറെ കഷ്ടപ്പെട്ട വ്യക്തിയാണ് അദ്ദേഹം. ജോലി തേടി മുംബൈയിലെത്തിയ ഷംസുദ്ദീന് ആദ്യകാലത്ത് കാര്യമായ അവസരങ്ങളൊന്നും ലഭിച്ചില്ല. ഒടുവിൽ സിനിമാ സെറ്റുകളിൽ ലൈറ്റ്മാനായി ജോലി ചെയ്തു. സിനിമാ ചിത്രീകരണത്തിനിടയിലെ വെളിച്ചം ഒരുക്കുന്നതായിരുന്നു ജോലി. അവിടെനിന്ന് കിട്ടുന്ന ചെറിയ വരുമാനം കൊണ്ടായിരുന്നു ജീവിതം മുന്നോട്ടുകൊണ്ടുപോയത്.

പിന്നീട് 2010-ൽ നാട്ടിലേക്ക് മടങ്ങിയെത്തിയ അദ്ദേഹം അരി വ്യാപാരം ആരംഭിച്ചു. ചെറിയ രീതിയിൽ തുടങ്ങിയ ബിസിനസ് ഇന്ന് വലിയ വളർച്ചയിലെത്തി. നിലവിൽ മൂന്ന് റൈസ് മില്ലുകളാണ് അദ്ദേഹത്തിനുള്ളത്. വിദേശ വിപണികളിലേക്കും അരി കയറ്റുമതി ചെയ്യുന്നുണ്ട്. ഒരുകാലത്ത് മുംബൈയിൽ ജോലി തേടി അലഞ്ഞുനടന്ന മനുഷ്യൻ ഇന്ന് കോടികളുടെ വാഹനങ്ങൾ സ്വന്തമായുള്ള വ്യവസായിയായി മാറി. റേഞ്ച് റോവർ, വോൾവോ, മഹീന്ദ്ര ഥാർ തുടങ്ങിയ വാഹനങ്ങൾ അദ്ദേഹത്തിന്റെ കാർ ശേഖരത്തിലുണ്ട്. ഇപ്പോൾ അതിലേക്ക് മകന്റെ സ്വപ്നമായ BMW M4 കൂടി എത്തിയിരിക്കുകയാണ്.

എന്നാൽ രണ്ടുകോടിയിലധികം വിലയുള്ള കാർ സ്വന്തമാക്കിയിട്ടും തൽഹയ്ക്ക് ഇപ്പോൾ അത് സ്വയം ഓടിക്കാൻ കഴിയില്ല. കാരണം പതിനഞ്ച് വയസ്സ് മാത്രമാണ് പ്രായം. നിയമപരമായി വാഹനമോടിക്കാനുള്ള പ്രായം എത്തിയിട്ടില്ല. കൗമാരക്കാർ കാർ ഓടിച്ചുള്ള അപകട വാർത്തകൾ ധാരളമാണ് വരുന്നത്. ഇനി വണ്ടിയെടുത്താൽ പോലീസിനെ അറിയിക്കാൻ നാട്ടുകാരും കാത്തിരിക്കുകയാണ്.

കാർ ഓടിക്കുമോ എന്ന ചോദ്യത്തിന് തൽഹ തന്നെ മറുപടി നൽകിയിട്ടുണ്ട്. ഇപ്പോൾ തന്റെ പ്രധാന ശ്രദ്ധ പഠനത്തിലാണ്. കാർ ഓടിക്കാനും ഉദ്ദേശിക്കുന്നില്ല. അച്ഛനാണ് കാർ ഓടിക്കുക. ആഴ്ചയിൽ ഒരുദിവസമെങ്കിലും അച്ഛനൊപ്പം പുതിയ കാറിൽ യാത്ര ചെയ്യണമെന്നാണ് തന്റെ ആഗ്രഹമെന്നും തൽഹ വ്യക്തമാക്കിയിട്ടുണ്ട്.

ഇതോടെയാണ് സമ്മാനത്തെച്ചൊല്ലി സോഷ്യൽ മീഡിയയിൽ ചർച്ചകൾ തുടങ്ങിയത്. ഒരു ഹാഫ് ഇയർലി പരീക്ഷയിലെ വിജയത്തിന് രണ്ടുകോടി മുപ്പത് ലക്ഷം രൂപയുടെ കാർ സമ്മാനിക്കുന്നത് അതിരുകടന്ന ആഡംബരമല്ലേ എന്നാണ് ഒരു വിഭാഗത്തിന്റെ ചോദ്യം. പതിനഞ്ചുകാരന് ഇത്രയും വിലയുള്ള കാർ സമ്മാനിക്കേണ്ടതുണ്ടോ, കുട്ടികളുടെ പ്രായത്തിനും സാഹചര്യത്തിനും അനുസരിച്ചുള്ള സമ്മാനങ്ങളല്ലേ നൽകേണ്ടത് എന്നിങ്ങനെയാണ് വിമർശനങ്ങൾ. പ്രായപൂർത്തിയാകാത്ത കുട്ടികൾ വാഹനമോടിക്കുന്നതുമായി ബന്ധപ്പെട്ട അപകടങ്ങൾ വർധിക്കുന്ന സാഹചര്യത്തിൽ ഇത്തരം സമ്മാനങ്ങൾ തെറ്റായ സന്ദേശം നൽകുമെന്ന ആശങ്കയും ചിലർ പങ്കുവയ്ക്കുന്നു.

അതേസമയം, ജീവിതത്തിൽ വലിയ കഷ്ടപ്പാടുകളിലൂടെ വളർന്നുവന്ന ഒരാൾക്ക് മകന്റെ ചെറിയ വിജയങ്ങൾ പോലും വലിയ ആഘോഷമാകുന്നതിൽ തെറ്റില്ലെന്നാണ് മറ്റൊരു വിഭാഗത്തിന്റെ അഭിപ്രായം. താൻ അനുഭവിച്ച ബുദ്ധിമുട്ടുകൾ മകൻ അനുഭവിക്കരുതെന്നും അവന്റെ ആഗ്രഹങ്ങൾ സാധിച്ചുകൊടുക്കണമെന്നുമുള്ള ഒരു പിതാവിന്റെ മനസ്സാണ് ഇതിന് പിന്നിലെന്നും ഇവർ പറയുന്നു.

എന്തായാലും ഒൻപതാം ക്ലാസിലെ ഹാഫ് ഇയർലി പരീക്ഷയ്ക്ക് രണ്ടുകോടി മുപ്പത് ലക്ഷം രൂപയുടെ സമ്മാനം! വാർത്ത കേട്ടവരെല്ലാം ഒരേ ചോദ്യം ചോദിക്കുകയാണ്. ഇനി പത്താം ക്ലാസ് പരീക്ഷയിൽ മകൻ മികച്ച വിജയം നേടിയാൽ അച്ഛൻ എന്തായിരിക്കും സമ്മാനിക്കുക? അതറിയാനായി കാത്തിരിക്കുകയാണ് എല്ലാവരും