റബര്‍ഷീറ്റും ഒട്ടുപാലും വിളവെടുക്കാറായ കൃഷി വിളകളും മോഷ്ടിക്കുന്ന സംഘത്തിലെ കുന്നത്തൂര്‍ സ്വദേശികളായ ആര്‍.എസ്.എസ് പ്രവര്‍ത്തകരടക്കം മൂന്ന് പേരെ പൊലീസ് അറസ്റ്റ് ചെയ്തു. കുന്നത്തൂര്‍ പടിഞ്ഞാറ് ബിജി ഭവനില്‍ ബിജു (22), പ്രശാന്ത് ഭവനത്തില്‍ പ്രശാന്ത് (21), മാനാമ്പുഴയില്‍ വാടകയ്ക്ക് താമസിക്കുന്ന തിരുവനന്തപുരം ആര്യനാട് പറണ്ടോട് സ്വദേശി ശില്‍പി (21) എന്നിവരാണ് പിടിയിലായത്. കുന്നത്തൂര്‍ മാനാമ്പുഴ തൃക്കണ്ണാപുരം ക്ഷേത്രത്തിനു സമീപം വച്ച് ഞായറാഴ്ച രാവിലെയോടെയാണ് ഇവരെ പൊലീസ് പിടികൂടിയത്. നാട്ടുകാര്‍ നല്‍കിയ രഹസ്യവിവരത്തെ തുടര്‍ന്നായിരുന്നു അറസ്റ്റ്.

കുന്നത്തൂര്‍, പോരുവഴി പ്രദേശങ്ങളിലായി നിരവധി വീടുകളില്‍ നിന്നും ഇവര്‍ റബ്ബര്‍ഷീറ്റുകള്‍ മോഷ്ടിച്ചിട്ടുണ്ട്. ഇടയ്ക്കാട് നിന്ന് 300 റബര്‍ഷീറ്റ് മോഷ്ടിച്ചതടക്കം 40ഓളം റബര്‍ മോഷണങ്ങള്‍ ഇവര്‍ നടത്തിയതായാണ് പൊലീസ് അനുമാനിക്കുന്നത്. പകല്‍ സമയങ്ങളില്‍ വീടുകള്‍ നോക്കി വച്ച ശേഷം രാത്രികാലങ്ങളില്‍ മോഷണം നടത്തുകയാണ് പതിവ്. കുന്നത്തൂരിലെ ഒരു റബ്ബര്‍ കട കുത്തിതുറന്ന് ഷീറ്റ് മോഷ്ടിച്ചതും ഇവരാണെന്ന് തെളിഞ്ഞിട്ടുണ്ട്.

രാഷ്ട്രീയ സംഘര്‍ഷം ഉണ്ടാക്കുകയെന്ന ലക്ഷ്യത്തോടെ കുന്നത്തൂര്‍ നെടിയവിള ജംഗ്ഷനിലടക്കം രാഷ്ട്രീയ പാര്‍ട്ടികളുടെ നിരവധി കൊടിമരങ്ങള്‍ നശിപ്പിച്ച കേസിലെ പ്രതികള്‍ കൂടിയാണിവര്‍. വിളവെത്തിയ ഏത്തവാഴക്കുലകളും ഇട കൃഷി വിളകളും മോഷ്ടിച്ച് കാര്‍ഷിക വിപണികളില്‍ എത്തിച്ച് വില്‍ക്കുന്നതും ഇവരുടെ പതിവാണ്. തെളിവെടുപ്പ് നടത്തി വരികയാണ്.