സമ്പത്തിന്റെ മഹിമകൊണ്ടാണ് തോമസ് ചാണ്ടി മന്ത്രിക്കസേരയില്‍ തുടരുന്നതെന്ന് പ്രതിപക്ഷനേതാവ് രമേശ് ചെന്നിത്തല. കേരള ജനത ഇത് തിരിച്ചറിഞ്ഞു. സി.പി.എം നേതാവ് ഇ.പി ജയരാജനെ മന്ത്രിസഭയില്‍ നിന്ന് പുറത്താക്കിയ മുഖ്യമന്ത്രി തോമസ് ചാണ്ടിയെ സംരക്ഷിക്കുന്നത് എന്തിനാണെന്ന് മാധ്യമങ്ങള്‍ അന്വേഷിക്കണമെന്നും ചെന്നിത്തല വാര്‍ത്താസമ്മേളനത്തില്‍ ആവശ്യപ്പെട്ടു.

കേരളത്തില്‍ ഒരു മുഖ്യമന്ത്രിമാരും വഴിവിട്ട രീതിയില്‍ പ്രവര്‍ത്തിച്ച മന്ത്രിമാരെ ഈ രീതിയില്‍ സംരക്ഷിച്ചിട്ടില്ല. കോടതിയില്‍ നിന്ന് പരാമര്‍ശം ഉണ്ടായ സ്ഥിതിക്ക് രാജിയല്ലാതെ മാര്‍ഗമില്ല. രാജിയില്ലെങ്കില്‍ പ്രതിപക്ഷം ശക്തമായ സമരം നടത്തും. സര്‍ക്കാരിന് കൂട്ടുത്തരവാദിത്തം നഷ്ടപ്പെട്ടെന്ന് കോടതി പറഞ്ഞ സ്ഥിതിക്ക് സര്‍ക്കാരിന് എങ്ങനെ തുടരാനാവില്ലെന്നും അദ്ദേഹം ചോദിച്ചു. പണത്തിന് മീതേ പരുന്തും പറക്കില്ലെന്നും ചെന്നിത്തല വ്യക്തമാക്കി. 

മന്ത്രിയുടെ രാജി എല്‍.ഡി.എഫ് തീരുമാനിച്ചിട്ടും മുഖ്യമന്ത്രിയെ ചുമതലപ്പെടുത്തിയിട്ടും എല്ലാ ഘടകക്ഷികളും എതിരായിട്ടും തോമസ് ചാണ്ടി തല്‍സ്ഥാനത്ത് തുടരുന്നത് ശരിയല്ല. മന്ത്രി രാജിവെച്ചാല്‍ പ്രതിപക്ഷത്തിന് അതില്‍ വലിയ പങ്കില്ലെന്നും മാധ്യമങ്ങള്‍ക്കാണ് ക്രഡിറ്റെന്നും അദ്ദേഹം വ്യക്തമാക്കി.