തോമസ് ചാണ്ടി വിഷയത്തില്‍ മുന്നണിയില്‍ പൊട്ടിത്തെറികള്‍ ഉണ്ടാകുന്നതിനിടെ ചേര്‍ന്ന മന്ത്രിസഭാ യോഗം അവസാനിച്ചു. രാവിലെ ഒന്‍പതുമണിക്ക് ചേര്‍ന്ന മന്ത്രിസഭാ യോഗം ഒരു മണിക്കൂറോളം നീണ്ടു നിന്നു. തോമസ് ചാണ്ടിയുടെ രാജിവിഷയം തീരുമാനമാകാതെ നീളുന്നതിലുള്ള കടുത്ത എതിര്‍പ്പറിയിച്ച് മുന്നണിയിലെ രണ്ടാം കക്ഷിയായ സിപിഐ യോഗത്തില്‍ നിന്ന് വിട്ടു നിന്നിരുന്നു.

എന്നാല്‍ ഇവര്‍ നാല് പേരും സെക്രട്ടറിയേറ്റില്‍ ഉണ്ടായിരുന്നുവെന്നാണ് വിവരം. റവന്യൂ മന്ത്രി ഇ.ചന്ദ്രശേഖരന്റെ മുറിയില്‍ കൂടിക്കാഴ്ച നടത്തിയ മന്ത്രിമാര്‍ യോഗം അവസാനിക്കുന്നതുവരെ ഇവിടെ തുടരുകയായിരുന്നു.