ഭൂമി കൈയേറ്റ വിഷയത്തില്‍ മുഖ്യമന്ത്രി പിണറായി വിജയന് കടുത്ത വിമർശനവുമായി എഴുത്തുകാരി ശാരദക്കുട്ടി. പിണറായി വിജയൻ എത്തി നിൽക്കുന്ന നിസ്സഹായാവസ്ഥ ഒരു യുക്തി കൊണ്ടും ന്യായീകരിക്കാനാകുന്നില്ലെന്നാണ് ശാരദക്കുട്ടി പറയുന്നത്. തന്റെ ഫേസ്ബുക്കിലൂടെയാണ് ശാരദക്കുട്ടി വിമർശനം നടത്തിയത്. ശാരദക്കുട്ടിയുടെ ഫേസ്ബുക്ക് കുറിപ്പ് ഇങ്ങനെ;

'പിണറായി വിജയൻ എത്തി നിൽക്കുന്ന ഈ നിസ്സഹായാവസ്ഥ , ഈ ദുർഘടാവസ്ഥ എങ്ങനെ സംഭവിച്ചതായാലും ശരി, ഒരു യുക്തി കൊണ്ടും ന്യായീകരിക്കാനാകുന്നില്ല. കഴിഞ്ഞ സർക്കാരിന്റെ കാലത്ത് കെ.എം മാണിയുടെ രാജി കാത്ത്, ഉമ്മൻ ചാണ്ടി അതാവശ്യപ്പെടുന്നത് കാത്ത് നിമിഷങ്ങളെണ്ണി ജനങ്ങളും മാധ്യമ പ്രവർത്തകരും രാത്രിയും പകലും കാത്തിരുന്നത് ഇന്നലെ എന്നതു പോലെ ഓർമ്മിക്കുന്നു.

ഇന്ന് അതേ കാര്യങ്ങളുടെ കുറേക്കൂടി മോശമായ ആവർത്തനങ്ങൾ എന്തു യുക്തി കൊണ്ട്, ഏതു ഭാഷ കൊണ്ട് ന്യായീകരിക്കും? ഈ നിസ്സഹായത, ഈ അപമാനഭാരം, പിണറായി വിജയന്റെ സർക്കാരിൽ അമിത വിശ്വാസമർപ്പിച്ച എന്നെ പോലെയുള്ള ഒരു സാധാരണക്കാരിക്ക് വലിയ ശിക്ഷയായി അനുഭവപ്പെടുകയാണ്.'