മുന്നണി പിളരുന്ന സാഹചര്യം ഒഴിവാക്കാനാണ് തോമസ് ചാണ്ടിയെ രാജിവെപ്പിച്ചതെന്ന് ബിജെപി സംസ്ഥാന അധ്യക്ഷന്‍ കുമ്മനം രാജശേഖരന്‍. മുഖ്യമന്ത്രി ആവശ്യപ്പെട്ടിട്ടല്ല രാജിയെന്ന തോമസ് ചാണ്ടിയുടെ വെളിപ്പെടുത്തല്‍ ഇതിന്റെ തെളിവാണ്. ഇത്ര ദുര്‍ബലനായ മുഖ്യമന്ത്രി കേരളം ഭരിക്കുന്നത് ഇതാദ്യമാണ്. കൂട്ടുത്തരവാദിത്തം ഇല്ലാതായ മന്ത്രിസഭയ്ക്ക് ഒരു നിമിഷം പോലും ഭരണത്തില്‍ തുടരാനുള്ള ധാര്‍മ്മിക അവകാശമില്ല - കുമ്മനം പറഞ്ഞു.

ഘടകക്ഷിയുടെ പ്രതിഷേധത്തെ തുടര്‍ന്ന് ഭരണം നഷ്ടമാകുമെന്ന അവസ്ഥ ഉണ്ടായപ്പോഴാണ് തീരുമാനം മാറ്റാന്‍ മുഖ്യമന്ത്രി ആവശ്യപ്പെട്ടതെന്നാണ് തോമസ് ചാണ്ടി പറഞ്ഞത്. മാത്രവുമല്ല സുപ്രീംകോടതിയെ സമീപിച്ച്‌ എത്രയും പെട്ടെന്ന് തിരികെ വരാന്‍ മുഖ്യമന്ത്രി ആശീര്‍വദിക്കുകയും ചെയ്തു. തോമസ് ചാണ്ടി മുഖ്യമന്ത്രിക്ക് എത്ര പ്രിയപ്പെട്ടവനാണെന്ന് ഇതില്‍ നിന്ന് വ്യക്തമാണ്. മന്ത്രിസ്ഥാനം രാജിവെച്ചതു കൊണ്ട് നിയമ പ്രശ്നം അവസാനിക്കുന്നില്ല. ബിജെപി ഉള്‍പ്പടെയുള്ള കക്ഷികള്‍ നടത്തിയ പോരാട്ടത്തിന്റെ ഉജ്ജ്വല വിജയമാണിത്. മന്ത്രി സ്ഥാനം രാജിവെച്ചതു കൊണ്ട് മാത്രം പ്രശ്നം തീരുന്നില്ല. കയ്യേറ്റക്കാരനായ തോമസ് ചാണ്ടി എംഎല്‍എ സ്ഥാനം രാജി വെക്കണമെന്നും കുമ്മനം പറഞ്ഞു.
കേരളത്തിലെ ഭരണഘടനാ പ്രതിസന്ധിയെപ്പറ്റി ഗവര്‍ണ്ണര്‍ വിശദീകരണം തേടണമെന്ന് ബിജെപി സംസ്ഥാന ജനറല്‍ സെക്രട്ടറി എംടി രമേശ് ആവശ്യപ്പെട്ടു. സമാന്തര മന്ത്രിസഭാ യോഗം ചേര്‍ന്നതോടെ സിപിഐക്ക് മുഖ്യമന്ത്രിയെ വിശ്വാസമില്ലെന്ന് തെളിഞ്ഞു. ഇത് ചരിത്രത്തില്‍ കേട്ടുകേള്‍വിയില്ലാത്ത സംഭവമാണ്. രണ്ടു മന്ത്രിസഭാ യോഗമെന്നത് ഭരണഘടനാ പ്രതിസന്ധിയാണ്. ഇതിന്റെ ഉത്തരവാദി മുഖ്യമന്ത്രിയാണ്. പരസ്പര വിശ്വാസവും കൂട്ടുത്തരവാദിത്തവും ഇല്ലാതായ മന്ത്രിസഭ ഉടന്‍ രാജി വെക്കണമെന്നും അദ്ദേഹം ആവശ്യപ്പെട്ടു