സാമ്പത്തിക സംവരണം; ഭരണഘടനാവിരുദ്ധം, തെരഞ്ഞെടുപ്പ് സമയത്ത് സി.പി.എം വിയര്ക്കും
ദേവസ്വം ബോര്ഡ് നിയമനങ്ങളില് മുന്നോക്കക്കാരിലെ പിന്നോക്ക വിഭാഗങ്ങള്ക്ക് സംവരണം നല്കാനുള്ള എല്.ഡി.എഫ് സര്ക്കാര് നീക്കത്തിനെതിരെ വ്യാപക പ്രതിഷേധം. ബി.ജെ.പി ബന്ധം വിട്ട് സി.പി.എമ്മുമായി അടുത്തുകൊണ്ടിരിക്കുന്ന എസ്.എന്.ഡി.പി യോഗം ജനറല് സെക്രട്ടറി വെള്ളാപ്പള്ളി നടേശന് പരസ്യമായി രംഗത്തെത്തി. ഇതിനെ നിയമപരമായി നേരിടുമെന്നും എസ്.എന്.ഡി.പി യോഗം കൗണ്സില് തീരുമാനിച്ചു. ഇത് നിരാശാദനകമാണ്. ഭരണഘനാ വിരുദ്ധമാണ്. ഇടതുപക്ഷത്തിന് വേണ്ടി പ്രവര്ത്തിക്കുന്ന പിന്നോക്കക്കാരെ വഞ്ചിക്കുകയാണ് ചെയ്തതെന്നും അദ്ദേഹം പറഞ്ഞു. നായര്- ഈഴവ ഐക്യകാലത്ത് സുകുമാരന് നായര് ഇത് തന്നെയാണ് ആവശ്യപ്പെട്ടതെന്നും വെള്ളാപ്പള്ളി പറഞ്ഞു.
സംവരണം സമ്പത്തിന്റെ അടിസ്ഥാനത്തില് നിര്വചിക്കേണ്ടതല്ലെന്നും സര്ക്കാര് നിലപാട് പ്രതിഷേധാര്ഹമാണെന്നും അദ്ദേഹം ചൂണ്ടിക്കാട്ടി. സര്ക്കാര് തീരുമാനം നിയമപരമായി നിലനില്ക്കില്ലെന്ന്് മുസ്്ലിംലീഗ് നേതാവ് ഇ.ടി മുഹമ്മദ് ബഷീര് എം.പി പറഞ്ഞു. വഖഫ് ബോര്ഡ് നിയമനങ്ങള് പി.എസ്.സിക്ക് വിടാനുള്ള സര്ക്കാര് നീക്കം ശരിയല്ലെന്നും അദ്ദേഹം പറഞ്ഞു. തീരുമാനം ബി.ജെ.പിയെ സഹായിക്കാനാണ്. സംവരണം ദാരിദ്രം മാറ്റാനുള്ള മാര്ഗമല്ലെന്ന് സര്ക്കാര് മനസിലാക്കണമെന്നും ഇ.ടി ചൂണ്ടിക്കാട്ടി.
നിലവിലുള്ള സംവരണം അട്ടിമറിച്ചല്ല ദേവസ്വം ബോര്ഡില് സാമ്പത്തിക സംവരണം നടത്തുന്നതെന്നും ഇക്കാര്യം എല്.ഡി.എഫിന്റെ പ്രകടന പത്രികയില് പറഞ്ഞിരുന്നെന്നും ദേവസ്വം മന്ത്രി കടകംപള്ളി സുരേന്ദ്രന് വ്യക്തമാക്കി. 10 ശതമാനം മുന്നോക്ക സംവരണം നടത്താനാണ് മന്ത്രിസഭാ യോഗം തീരുമാനിച്ചത്. അഞ്ച് ദേവസ്വം ബോര്ഡുകളിലാണ് ഇത് നടപ്പാക്കാന് ഉദ്ദേശിക്കുന്നത്. ഒരാഴ്ച മുമ്പ് മുഖ്യമന്ത്രി പിണറായി വിജയനുമായി എന്.എസ്.എസ് ജനറല്സെക്രട്ടറി സുകുമാരന് നായര് കോട്ടയം ഗസ്റ്റ്ഹൗസില് കൂടിക്കാഴ്ച നടത്തിയിരുന്നു. അതിന് ശേഷമാണ് സംവരണം നടപ്പാക്കാന് തീരുമാനിച്ചത്. സംവരണം വേണ്ടെന്നും സാമ്പത്തിക സംവരണം നടപ്പാക്കണമെന്നും പറയുന്ന സംഘപരിവാര് ശക്തികളെ പേടിച്ചാണ് എല്ഡിഎഫ് പുതിയ തീരുമാനം എടുത്തതെന്ന് ആക്ഷേപമുണ്ട്.
കഴിഞ്ഞ യു.ഡി.എഫ് സര്ക്കാരിന്റെ പരിഗണനയില് ഈ വിഷയം ഉണ്ടായിരുന്നെങ്കിലും തൊട്ടാല് പൊള്ളുന്ന വിഷയമായതിനാല് നടപ്പാക്കിയില്ല. എന്.എസ്.എസുമായി ഏറെ അടുപ്പമുള്ള ചെന്നിത്തല ഉള്പ്പെടെ മന്ത്രിയായിരുന്നിട്ടും നടപ്പാകാത്ത കാര്യമാണ് പിണറായി സര്ക്കാര് ചെയ്തു കൊടുത്തത്. തൊട്ടുപിന്നാലെ ജാതിസംവരണം അശാസ്ത്രീയമാണെന്ന വാദവുമായി സുകുമാരന് നായര് രംഗത്തെത്തിയിരുന്നു. എന്.എസ്.എസിനെ വോട്ടുബാങ്കായി നിലനിര്ത്താനാണ് സി.പി.എം ഇതിലൂടെ ശ്രമിക്കുന്നതെന്നാണ് രാഷ്ട്രീയ നിരീക്ഷകര് വിലയിരുത്തുന്നത്.
https://www.facebook.com/Malayalivartha
