വേങ്ങ സ്വദേശിയായ യുവാവിന്റേയും കല്ലടക്കാരിയായ യുവതിയുടെയും വിവാഹത്തിനെത്തിയതായിരുന്നു വധുവിന്റെ സംഘത്തിലെ യുവാക്കൾ. വിവാഹത്തിനെത്തിയ ഒരു യുവതിയെക്കണ്ടപ്പോൾ ഒരാഗ്രഹം ഒന്ന് കമന്റടിച്ചാലോ. ഒട്ടും താമസിപ്പിച്ചില്ല. യുവാക്കൾ കമന്റടിച്ചു. ഇത് വരന്റെ ആളുകളെ ചൊടിപ്പിച്ചു. ഒടുവിൽ യുവാക്കളും വരന്റെ ആളുകളും തമ്മിൽ സംഘട്ടനമായി.

ഇന്നലെ ഉച്ചയ്ക്ക് ഒരുമണിയോടെ കാരാളിമുക്കിന് സമീപം ആദിക്കാട്ടുമുക്കിലെ ഓഡിറ്റോറിയത്തിലായിരുന്നു സംഭവം. താലികെട്ട് കഴിഞ്ഞ ശേഷമാണ് സംഘട്ടനം തുടങ്ങിയത്. വരന്റെ ബന്ധുകൂടിയായ യുവതിയെയാണ് ചിലർ കമന്റടിച്ചത്.

ഇത് ചോദ്യം ചെയ്യാനെത്തിയ വരന്റെ ആളുകളും ഇവരും തമ്മിൽ ഏറ്റുമുട്ടുകയായിരുന്നു. ഈ സമയം ഭക്ഷണശാലയിൽ സദ്യ തടസം കൂടാതെ നടന്നു. കൂട്ടയടി കണ്ട് കുഴഞ്ഞുവീണ വരന്റെ മാതാവിനെ താലൂക്ക് ആശുപത്രിയിൽ പ്രവേശിപ്പിച്ചു.

സംഘട്ടനത്തിൽ ഇരു ഭാഗത്തെയും നിരവധി പേർക്ക് പരിക്കേറ്റിട്ടുണ്ട്. ഒടുവിൽ ശാസ്താംകോട്ട പൊലീസ് സ്ഥലത്തെത്തിയാണ് ഒത്തുതീർപ്പാക്കിയത്.