ഉത്തര്‍പ്രദേശില്‍ ദിബ്രുഗഡ് എക്സ്പ്രസ് പാളം തെറ്റി. ചണ്ഡിഗഡില്‍ നിന്നും ദിബ്രുഗഡിലേക്ക് പുറപ്പെട്ട ദിബ്രുഗഡ് എക്സ്പ്രസാണ് പാളം തെറ്റിയത്. ഉത്തര്‍പ്രദേശിലെ ഗോണ്ടയിലെ ജിലാഹി റെയില്‍വേസ്റ്റേഷന് സമീപത്തായിരുന്നു അപകടം. പത്ത് മുതല്‍ 12 കോച്ചുകള്‍ മറിഞ്ഞെന്നാണ് പ്രാഥമിക റിപ്പോര്‍ട്ട്. അപകടത്തില്‍ നാല് പേര്‍ മരണപ്പെട്ടതായി സൂചനയുണ്ട്. അപകടത്തെ തുടര്‍ന്ന് ഇതുവഴി കടന്നുപോകേണ്ടിയിരുന്ന മറ്റ് ട്രെയിനുകളെ വഴിതിരിച്ച് വിട്ടതായി നോര്‍ത്ത് ഈസ്റ്റേണ്‍ റെയില്‍വേയുടെ സിപിആര്‍ഒ ഉദ്യോഗസ്ഥനായ പങ്കജ് സിംഗ് മാദ്ധ്യമങ്ങളോട് പറഞ്ഞു.

അപകടത്തില്‍ ട്രെയിനിന്റെ എ സി കോച്ചുകള്‍ക്ക് കാര്യമായ കേടുപാടുകള്‍ സംഭവിച്ചിട്ടുണ്ട്. ഇതോടെ യാത്രക്കാര്‍ പരിഭ്രാന്തരാകുകയായിരുന്നു. അപകടസ്ഥലത്ത് രക്ഷാപ്രവര്‍ത്തനം തുടരുകയാണെന്നാണ് ലഭിക്കുന്ന വിവരം. ദിബ്രുഗഡ് എക്‌സ്പ്രസ് ചണ്ഡിഗഡില്‍ നിന്നും ദിബ്രുഗഡിലേക്ക് സ്ഥിരം സര്‍വീസ് നടത്തുന്ന ട്രെയിനാണ്. അപകടത്തില്‍ മരിച്ചവരുടെയും പരിക്കേ?റ്റവരുടെയും വിശദവിവരങ്ങള്‍ ശേഖരിച്ചുവരികയാണെന്നാണ് അധികൃതര്‍ അറിയിച്ചത്.

അപകടസ്ഥലത്തേക്ക് 40 അംഗ മെഡിക്കല്‍സംഘത്തെയും 15 ആംബുലന്‍സുകളും അയച്ചിട്ടുണ്ട്. സംഭവം നിരീക്ഷിക്കുന്നതിനായി ജില്ലാ മജിസ്ട്രേറ്റും ഉന്നത പൊലീസ് ഉദ്യോഗസ്ഥരും പുറപ്പെട്ടിട്ടുണ്ട്. ജിലാഹി റെയില്‍ വേ സ്‌റ്റേഷന്‍ എത്തുന്നതിന് കുറച്ച് കിലോമീറ്ററുകള്‍ക്ക് മുന്‍പ് പാളം തെറ്റുകയായിരുന്നു.