അരുൺജയ്റ്റ്ലി സമ്പദ് രംഗത്തെ കുട്ടിച്ചോറാക്കിയെന്നും നോട്ട് അസാധുവാക്കൽ വൻദുരന്തമായിരുന്നെന്നും അഭിപ്രായപ്പെട്ട മുൻ കേന്ദ്രമന്ത്രിയും ബിജെപി നേതാവുമായ യശ്വന്ത് സിൻഹക്ക് കേന്ദ്ര ആഭ്യന്തരമന്ത്രി രാജ്നാഥ് സിംഗിന്‍റെ മറുപടി. അനുദിനം വളരുന്ന സാമ്പത്തിക രംഗമാണ് ഇന്ത്യയുടേത് ഈ വളർച്ചയെ അന്താരാഷ്ട്ര സമൂഹം അംഗീകരിച്ചതാണെന്നും അത് ആരും മറന്നു പോകരുതെന്നും രാജ്നാഥ് സിംഗ് പറഞ്ഞു.

ഒരു ഇംഗ്ലീഷ് മാധ്യമത്തിലെഴുതിയ ലേഖനത്തിലായിരുന്നു യശ്വന്ത് സിൻഹ മോദി സർക്കാരിന്‍റെ സാമ്പത്തിക പരിഷ്കാരങ്ങളെ വിമർശിച്ചത്. രാജ്യം സാമ്പത്തിക മാന്ദ്യത്തിലേക്ക് പോയതിൽ ബിജെപിയിൽ പലർക്കും അതൃപ്തിയുണ്ടെന്നും, രാജ്യത്തെ സാമ്പത്തിക രംഗം കണ്ട ഏറ്റവും വലിയ ദുരന്തമായ നോട്ട് നിരോധനത്തിന്‍റെ പ്രത്യാഘതങ്ങൾ എല്ലാ മേഖലയിലും പ്രകടമാണെന്നും യശ്വന്ത് സിൻഹ അഭിപ്രായപ്പെട്ടിരുന്നു.

ജിഎസ്ടി നടപ്പാക്കിയതിൽ സർക്കാരിന് വീഴ്ച സംഭവിച്ചുവെന്നും ജിഎസ്ടി നടപ്പാക്കിയതിലൂടെ നിരവധി ചെറുകിട സംരഭങ്ങൾ തകർന്നുവെന്നും സിൻഹ കുറ്റപ്പെടുത്തി. ചെറുകിട സംരഭങ്ങൾ അടച്ചു പൂട്ടിയതോടെ നിരവധി പേർക്കു തൊഴിൽ നഷ്ടമായെന്നും യശ്വന്ത് സിൻഹ പറഞ്ഞു.