അച്ഛനെയും മകളെയും പോലെ ജീവിച്ച ഞങ്ങളെപ്പറ്റി അപവാദം പ്രചരിപ്പിക്കരുതെന്ന് ഗുർമീതിന്റെ വളർത്തുപുത്രി ഹണി പ്രീത്. കാമുകീകാമുകന്മാര്‍ എന്ന രീതിയിലാണ് അപവാദങ്ങൾ പ്രചരിക്കുന്നത്. പ്രചരിക്കുന്ന കഥകൾ സത്യമല്ല എന്നാണ് ഹണി പ്രീതിന്റെ വാദം. ഒരു മാസത്തിലേറെയായി ഒളിവിൽക്കഴിയുന്ന ഹണിപ്രീത് ഒരു ദേശീയമാധ്യമത്തിനു നൽകിയ അഭിമുഖത്തിലാണ് ഇക്കാര്യങ്ങൾ സംസാരിച്ചത്. ഒളിച്ചുകളി അവസാനിപ്പിച്ച് ഇന്ന് കോടതിയിൽ കീഴടങ്ങാനും അവർക്ക് പദ്ധതിയുണ്ട്.

പരിശുദ്ധമായ അച്ഛന്‍ മകള്‍ ബന്ധത്തെ എങ്ങനെ തെറ്റായ രീതിയിൽ വ്യാഖ്യാനിക്കാൻ കഴിയുന്നു എന്നാണ് ഹണിപ്രീത് ചോദിക്കുന്നത്. പിതാവും മകളും തമ്മിലുള്ള ബന്ധമാണ് തങ്ങള്‍ക്കിടയില്‍ ഉള്ളത്. പ്രചരിക്കുന്നത് തെറ്റായ കഥകളാണ്. എങ്ങിനെയാണ് ഒരു മകളുടെ മേല്‍ പിതാവിന് കൈവെയ്ക്കാന്‍ കഴിയുന്നത്. ഒരു മകള്‍ക്ക് പിതാവിനെ സ്‌നേഹിക്കാന്‍ പറ്റില്ലേയെന്നും ചോദിച്ചു. സത്യം വേറൊരു വഴിക്കായിരിക്കെ ലോകം തങ്ങളെ വേറൊരു രീതിയില്‍ കാണുന്നത് ഞെട്ടിക്കുകയും വേദനിപ്പിക്കുകയും ചെയ്യുന്നു. എന്തിനാണ് മാധ്യമങ്ങള്‍ തന്നെ ഇങ്ങനെ വലുതാക്കി കാണിക്കുന്നതെന്ന് മനസ്സിലാകുന്നില്ല.

ഇന്ത്യയെ അങ്ങേയറ്റം സ്‌നേഹിക്കുന്ന ദേശസ്‌നേഹികളായ ഞങ്ങളോട് ഈ രീതിയില്‍ എങ്ങനെ പെരുമാറാന്‍ കഴിയുമെന്നും ഹണി ചോദിച്ചു. തന്റെ മുന്‍ഭര്‍ത്താവ് വിശ്വാസ് ഗുപ്ത തനിക്കാരുമല്ലെന്നും അവരെക്കുറിച്ച് സംസാരിക്കാന്‍ താന്‍ താല്‍പ്പര്യപ്പെടുന്നില്ലെന്നും ഈ സമൂഹത്തില്‍ അയാള്‍ പ്രധാനമാണോയെന്നും ചോദിച്ചു. ഒരു നടിയാകാന്‍ ഒരിക്കലും ആഗ്രഹിച്ചിട്ടില്ല. ക്യാമറയ്ക്ക് പിന്നില്‍ നില്‍ക്കാനായിരുന്നു എന്നും താല്‍പ്പര്യം. എന്നാല്‍ പറ്റിയ നടിയെ കിട്ടാതെ വന്നപ്പോള്‍ അഭിനയിച്ചെന്ന് മാത്രമേയുള്ളൂ. തന്റെ പിതാവ് നിരപരാധിയാണ് . ഒരാള്‍ അയച്ച കത്തിന്റെ അടിസ്ഥാനത്തില്‍ ആരെങ്കിലും കുറ്റക്കാരനാകുമോ? ദേരയില്‍ ഇതുവരെ ഒരു പെണ്‍കുട്ടിയും മാനഭംഗത്തിന് ഇരയായിട്ടില്ല. ദേരയിലെ മറ്റ് സ്ത്രീകളുടെ അഭിപ്രായം ചോദിക്കപ്പെട്ടില്ലെന്നും അവര്‍ ആരോപിച്ചു. രാം റഹീമിന് തടവ് ശിക്ഷ കിട്ടിയതിന് പിന്നാലെ ഹണിപ്രീത് നേപ്പാളിലേക്ക് കടന്നതായിട്ടായിരുന്നു വാര്‍ത്തകള്‍. എന്നാല്‍ താന്‍ നേപ്പാളിന് പോയില്ലെന്നും ഇന്ത്യയില്‍ തന്നെയുണ്ടായിരുന്നതായും പറഞ്ഞു.

ഹണിപ്രീത് എന്ന പ്രിയങ്കാ തനേജയുടെ മുന്‍കൂര്‍ ജാമ്യാപേക്ഷ കഴിഞ്ഞയാഴ്ചയാണ് ഹൈക്കോടതി തള്ളിയത്. ഇതിന് പിന്നാലെയാണ് ഇവര്‍ കീഴടങ്ങാന്‍ ഒരുങ്ങുന്നത്. രണ്ടു ബലാത്സംഗക്കേസില്‍ ഗുര്‍മീതിനെ തടവുശിക്ഷയ്ക്ക് വിധിച്ചതിന് പിന്നാലെ നടന്ന അക്രമസംഭവങ്ങളുടെ പേരില്‍ ഹണീപ്രീതിനും മറ്റ് ദേരാ അംഗങ്ങള്‍ക്കും എതിരേ അക്രമം പ്രചരിപ്പിച്ചതിന് കേസെടുത്തിരുന്നു. ഇതേ തുടര്‍ന്ന് അവര്‍ ഒളിവില്‍ പോയിരുന്നു. ഹരിയാനാപോലീസ് ഇവര്‍ക്കും മറ്റ് 42 പേര്‍ക്കുമെതിരേ ലുക്കൗട്ട് നോട്ടീസ് പുറപ്പെടുവിക്കുകയും ചെയ്തിരുന്നു.