വേണ്ടിവന്നാൽ ഇന്ത്യക്കെതിരെ ആണവാക്രമണം അടക്കമുള്ള മാർഗങ്ങൾ സ്വീകരിക്കാൻ മടിക്കില്ലെന്ന് പാകിസ്ഥാൻ വിദേശകാര്യമന്ത്രി ഖ്വാജ ആസിഫ് . ഒരേസമയം പാകിസ്ഥാനും ചൈനയ്ക്കും എതിരെയുള്ള യുദ്ധത്തിന് സേന എല്ലാത്തരത്തിലും സജ്ജമാണെന്ന് എയർ ചീഫ് മാർഷൽ ബി.എസ്.ധനോവയുടെ പ്രസ്താവനയോട് പ്രതികരിക്കുകയായിരുന്നു അദ്ദേഹം. ശത്രുക്കളെ കണ്ടെത്തുന്നതിനും അതിർത്തിയിലെ ഏത് സ്ഥലത്തും ആക്രമം നടത്തുന്നതിനും സേന സുസജ്ജമാണെന്നും അതേക്കുറിച്ച് ആശങ്ക വേണ്ടെന്നും ഇന്ത്യൻ വ്യോമസേന മേധാവി ബി എസ് ധനോവ വ്യക്തമാക്കിയിരുന്നു.

പാക്കിസ്ഥാനെതിരെ ഇന്ത്യ മിന്നലാക്രമണം നടത്തുകയോ ആണവ ആക്രമണത്തിന് മുതിരുകയോ ചെയ്താൽ പാകിസ്ഥാനിൽ നിന്നും ദയ പ്രതീക്ഷിക്കരുതെന്നും അതേ രൂപത്തിൽ തന്നെ തിരിച്ചടിക്കുമെന്നും അദ്ദേഹം മുന്നറിയിപ്പ് നൽകി.തങ്ങളുടെ അയൽക്കാരുമായി സമാധാനത്തോടെ ജീവിക്കണമെന്നാണ് പാകിസ്ഥാൻ ആഗ്രഹിക്കുന്നതെന്ന് ആസിഫ് പറഞ്ഞു. എന്നാൽ പാകിസ്ഥാന്റെ പരമാധികാരത്തെ ആര് ചോദ്യം ചെയ്താലും അവർ ദയ പ്രതീക്ഷിക്കേണ്ടതില്ലെന്നും അദ്ദേഹം കൂട്ടിച്ചേർത്തു.