ജി.എസ്.ടിയില്‍ ഇളവ് വരുത്തിയ ധനമന്ത്രി അരുണ്‍ ജെയ്റ്റ്‌ലിയെ പ്രശംസിച്ച് പ്രധാനമന്ത്രി നരേന്ദ്രമോദി. രാജ്യത്തെ വ്യാപാരികള്‍ക്ക് ദീപാവലി നേരത്തെ എത്തിയിരിക്കുകയാണ്. ജി.എസ്.ടി കൗണ്‍സില്‍ 27 ഇനങ്ങളുടെ നികുതിയാണ് കുറച്ചത്. ജി.എസ്.ടി സമ്പ്രദായം മൂന്നുമാസമായി വരുത്തിയ മാറ്റങ്ങളും പ്രയാസങ്ങളും സര്‍ക്കാര്‍ വിലയിരുത്തിയിട്ടുണ്ട്. അതിന്റെ ഭാഗമായാണ് ഭക്ഷ്യോല്‍പന്നങ്ങള്‍ ഉള്‍പ്പെടെയുള്ളവക്ക് ജി.എസ്.ടി കൗണ്‍സില്‍ നികുതി ഇളവ് പ്രഖ്യാപിച്ചതെന്നും മോദി പറഞ്ഞു.

ദ്വിദിന ഗുജറാത്ത് സന്ദര്‍ശനത്തിനെത്തിയ മോദി ഓഖയില്‍ നിന്ന് ബൈയ്റ്റ് ദ്വാരക വരെയുള്ള പാലത്തിന്റെ ശിലാസ്ഥാപനം നിര്‍വഹിച്ച് സംസാരിക്കുകയായിരുന്നു. ഇന്ത്യയില്‍ ആരെയും ദാരിദ്ര്യത്തില്‍ കഴിയാന്‍ അനുവദിക്കുകയില്ല. ഫലവത്തായ വികസനമാണ് സര്‍ക്കാര്‍ ലക്ഷ്യമിടുന്നത്. രാജ്യത്തിന് തുറമുഖങ്ങളും തുറമുഖ അനുബന്ധ വികസനങ്ങളും അനിവാര്യമാണ്. സമുദ്രസമ്പത്ത് രാജ്യത്തിന്റെ വികസനത്തിന് സഹായകമാണെന്നും മോദി പറഞ്ഞു.

മത്സ്യബന്ധന തൊഴില്‍ മേഖലയെ പരിപോഷിപ്പിക്കാനുള്ള പദ്ധതികള്‍ സര്‍ക്കാര്‍ ആസൂത്രണം ചെയ്തിട്ടുണ്ട്. തൊഴിലാളികള്‍ക്ക് മത്സ്യബന്ധന ഉപകരണങ്ങള്‍ വാങ്ങിക്കുന്നതിനായി കുറഞ്ഞ പലിശ നിരക്കില്‍ വായ്പയും മറ്റ് സൗകര്യങ്ങളും നല്‍കുന്നുണ്ട്. മത്സ്യബന്ധന തൊഴിലാളികളുടെ ദാരിദ്ര്യം ഇല്ലാതാക്കാനാണ് സര്‍ക്കാര്‍ ശ്രമം. കാണ്ട്‌ല തുറമുഖം വളര്‍ന്നുകൊണ്ടിരിക്കയാണ്. വികസനത്തിന് വേണ്ടിയാണ് സര്‍ക്കാര്‍ നിലകൊണ്ടിരിക്കുന്നതെന്നും അദ്ദേഹം പറഞ്ഞു.