മുഖ്യമന്ത്രി പിണറായി വിജയനും തിരുവിതാംകൂര്‍ ദേവസ്വം ബോര്‍ഡിനും നടന്‍ കമലഹാസന്റെ അഭിനന്ദനം. 36 അബ്രാഹ്മണ ശാന്തിമാരെ ദേവസ്വം ബോര്‍ഡിന്റെ അമ്പലങ്ങളില്‍ നിയമിച്ചതിനാണ് ഉലകനായകന്‍, മുഖ്യമന്ത്രിയെയും ദേവസ്വം ബോര്‍ഡിനെയും അഭിനന്ദിച്ചത്. ഈ തീരുമാനത്തിലൂടെ തമിഴ് സാമൂഹ്യ പരിഷ്‌കര്‍ത്താവായ പെരിയാറിന്റെ സ്വപ്നങ്ങളാണ് നടപ്പായതെന്നും ഫെയ്‌സ്ബുക്ക് പോസ്റ്റിലൂടെ കമല്‍ കുറിച്ചു.

തിരുവിതാംകൂര്‍ ദേവസ്വം ബോര്‍ഡിന്റെ ചരിത്രത്തില്‍ ആദ്യമായായിരുന്നു പി.എസ്.സി മാതൃകയില്‍ എഴുത്തുപരീക്ഷയും അഭിമുഖവും നടത്തി 6 ദളിതര്‍ അടക്കം 36 അബ്രാഹ്മണ ശാന്തിമാരെ നിയമിച്ചത്. അഴിമതിക്ക് അവസരം നല്‍കാതെ മെരിറ്റ് പട്ടികയും സംവരണ പട്ടികയും ഉള്‍പ്പെടുത്തി നിയമനം നടത്തണമെന്ന് ദേവസ്വം മന്ത്രി കടകംപള്ളി സുരേന്ദ്രന്‍ നിര്‍ദ്ദേശം നല്‍കിയിരുന്നു.