സംസ്ഥാനത്ത് വിധവകളെ വിവാഹം കഴിക്കാൻ തയ്യാറാകുന്നവർക്ക് രണ്ട് ലക്ഷം രൂപ പാരിതോഷികം പ്രഖ്യാപിച്ചിരിക്കുകയാണ്. മധ്യ പ്രദേശിലെ സാമൂഹിക നീതി വകുപ്പാണ് സാമ്പത്തിക സമ്മാനം നൽകുമെന്ന് അറിയിച്ചത്. വിധവാ വിവാഹം പ്രോത്സാഹിപ്പിക്കാൻ വേണ്ടിയാണ് പുതിയ തീരുമാനം. രാജ്യത്തെ ഇത്തരത്തിലുള്ള ആദ്യത്തെ സംരംഭമാണ് മധ്യ പ്രാദേശിലേതെന്ന് സർക്കാർ പറഞ്ഞു.

ഒരു വർഷം 1000 വിധവകളെ വിവാഹം കഴിപ്പിച്ചയക്കുക എന്നതാണ് ഇത് കൊണ്ട് ലക്ഷ്യമിടുന്നത്. 2017 ജൂലൈയിൽ വിധവാ വിവാഹം പ്രോത്സാഹിപ്പിക്കുന്നതിന് വേണ്ടി എന്തെങ്കിലും പദ്ധതികൾ കൊണ്ടു വരണമെന്ന് സുപ്രീം കോടതി ഉത്തരവിട്ടിരുന്നു. ഇതിൽ നിന്നും പ്രചോദനം ഉൾക്കൊണ്ടാണ് സർക്കാർ പുതിയ പദ്ധതി കൊണ്ടു വന്നത് .

നേരത്തെ 1856 ലാണ് വിധവാ വിവാഹം സംസ്ഥാനത്ത് നിയമാനുസൃതമാക്കിയത്. നിലവിലെ നിയമമനുസരിച്ചു 18 നും 45 നും ഇടയിൽ പ്രായമുള്ള വിധവകൾക്കാണ് പണം ലഭിക്കുക. ഇതിനുള്ള പ്രമേയം പാസായിട്ടുണ്ട്. ഇനി ധനകാര്യ വകുപ്പിന്റെ അനുവാദം കൂടി കിട്ടിയാൽ ഇത് പ്രവർത്തികമാകും.

അതേസമയം നിയമത്തെ ദുർവിനിയോഗം ചെയ്യാൻ സാധ്യതയുള്ളതിനാൽ തന്നെ സർക്കാർ ചില നിർദ്ദേശങ്ങൾ മുന്നോട്ട് വെക്കുന്നുണ്ട്. ഒന്ന്, പുരുഷന്റേത് ആദ്യത്തെ വിവാഹമായിരിക്കണം. രണ്ടാമത്, ദമ്പതികൾ ജില്ലാ കളക്ടറേറ്റിൽ നിന്നും വിവാഹം രജിസ്റ്റർ ചെയ്യണം. ഗ്രാമപഞ്ചായത്തുകൾ, തദ്ദേശസ്വയംഭരണ സ്ഥാപനങ്ങൾ എന്നിവർ നൽകുന്ന തെളിവുകൾ സ്വീകരിക്കുകയില്ല .