36 കാരിക്ക് തന്നെക്കാൾ പത്തുവയസിന് താഴെ പ്രായമുള്ള യുവാവിനോട് പ്രണയം. 36 കാരിയായ സന്തോഷയും 26 കാരനായ ഹനുമന്‍ ജാട്ടും പരിശീലനത്തിനിടെയാണ്കണ്ടുമുട്ടുകയും പ്രണയത്തിലാവുകയും ചെയ്തത്. ആറു മാസമായി ഇരുവരും സ്വന്തമായി ഒരു കരാട്ടേ കേന്ദ്രം നടത്തിവരികയായിരുന്നു. ഇതിനിടയില്‍ ഉദയ്പൂരും ജയ്പൂരിലുമെല്ലാം ഇരുവരും പല തവണ കണ്ടുമുട്ടി.

പിന്നീട് ഒരുമിച്ച് പുതിയ ജീവിതം തുടങ്ങാന്‍ തീരുമാനിച്ചു. സ്വതന്ത്രമായി ജീവിക്കാൻ ഭർത്താവും മക്കളും സന്തോഷക്കും കാമുകനും ഒരു തടസ്സമായിരുന്നു. ഒടുവിൽ അവരെ ഇല്ലാതാക്കാൻതന്നെ സന്തോഷയും കാമുകനും തീരുമാനിച്ചു. രാജസ്ഥാനിലെ ആല്‍വാറില്‍ ഒക്‌ടോബര്‍ മൂന്നാം തീയതി രാത്രിയില്‍ സന്തോഷ ഭര്‍ത്താവിനും കുഞ്ഞുങ്ങള്‍ക്കും ഭക്ഷണത്തില്‍ ഉറക്കഗുളിക നല്‍കുകയും അവർ മയങ്ങിയശേഷം വാടക കൊലയാളികളെ വീട്ടിനുള്ളിലേക്ക് കടത്തിവിടുകയും ചെയ്തു. ഇതിന് ശേഷം അസുഖം നടിച്ച് അവര്‍ ഹോസ്പിറ്റലില്‍ അഡ്മിറ്റാകുകയും ചെയ്തു. ഭര്‍ത്താവിനൊപ്പം ഒരു ബന്ധു ഉള്‍പ്പെടെ നാലു കുട്ടികളെയാണ് സന്തോഷയുടെയും കാമുകന്റെയും ഗൂഢാലോചനയോടെ വാടകഗുണ്ടകൾ കൊലപ്പെടുത്തിയത്. മൂന്ന്‌പേര്‍ സന്തോഷയുടേയും ഭര്‍ത്താവിന്‍റെയും ഒരാള്‍ ഭര്‍ത്തൃസഹോദരിയുടെ കുട്ടിയുമാണ്.

യുവതിയുടെ പെരുമാറ്റത്തില്‍ സംശയം തോന്നിയ പോലീസ് യുവതിയുടെ ഫോൺ സന്ദേശങ്ങൾ ശേഖരിച്ചിരുന്നു. പിന്നീട് യുവതിയേയും കാമുകനെയും ഒരുമിച്ച് ചോദ്യം ചെയ്തപ്പോഴാണ് സത്യാവസ്ഥ പുറത്തുവന്നത്. സംഭവത്തിൽ സന്തോഷയെയും കൊലപാതകം ചെയ്ത പത്തൊമ്പത് വയസ്സുകാരായ കപില്‍, ദീപക് എന്നിവരെയും പോലീസ് അറസ്റ്റ് ചെയ്തു.