മെട്രോ ചാര്‍ജ് വര്‍ദ്ധനയ്‌ക്കെതിരെ ആംആദ്മി സര്‍ക്കാര്‍ സമരത്തിന്
ഡല്‍ഹി മെട്രോ ട്രെയിന്‍ നിരക്കുകള്‍ വര്‍ദ്ധിപ്പിച്ച സാഹചര്യത്തില്‍ കേന്ദ്ര നഗര വികസന മന്ത്രാലയത്തിന്റെ നടപടിയെ രാഷ്ട്രീയമായി നേരിടാന്‍ ആം ആദ്മി സര്‍ക്കാര്‍ നീക്കം തുടങ്ങി. 13ന് നഗരത്തിലെ മെട്രോ സ്‌റ്റേഷനുകള്‍ക്ക് മുന്നില്‍ സത്യാഗ്രഹവും നഗരവികസന മന്ത്രാലയത്തിന് മുന്നില്‍ ഉപരോധവും സംഘടിപ്പിക്കും.
പുതിയ നിരക്കുകള്‍ പ്രകാരം, കുറഞ്ഞ നിരക്കായ പത്തു രൂപയില്‍ സഞ്ചരിക്കാനുള്ള ദൂരം രണ്ടു കിലോമീറ്ററായി കുറഞ്ഞു. അതിനു മുകളില്‍ പത്തു രൂപയുടെ വര്‍ദ്ധനയും വന്നു. പരമാവധി നിരക്ക് 50 രൂപയില്‍ നിന്ന് 60രൂപയായി. മെട്രോയുടെ പ്രവര്‍ത്തനത്തിന് ഫണ്ട് കണ്ടെത്താന്‍ നിരക്കു വര്‍ദ്ധിപ്പിച്ചെന്നാണ് ഡല്‍ഹി മെട്രോ കോര്‍പറേഷന്റെ വാദം.
വര്‍ദ്ധനയ്‌ക്കെതിരെ ഡല്‍ഹി നിയമ സഭ പാസാക്കിയ പ്രമേയം കേന്ദ്രസര്‍ക്കാര്‍ തള്ളിയിരുന്നു. അഞ്ചു മാസം മുന്‍പാണ് മിനിമം തുക പത്തുരൂപയാക്കി നിരക്കു വര്‍ദ്ധിപ്പിച്ചത്. ഇപ്പോള്‍ വീണ്ടും നിരക്കു വര്‍ദ്ധിപ്പിച്ചത് ഓണ്‍ലൈന്‍ ടാക്‌സികള്‍ക്ക് നേട്ടമുണ്ടാക്കാനാണെന്ന് പാര്‍ട്ടി കണ്‍വീനര്‍ ഗോപാല്‍ റായ് ആരോപിച്ചു. മെട്രോയുടെ നടത്തിപ്പ് കൈമാറിയാല്‍ നിരക്കു വര്‍ദ്ധന ഇല്ലാതെ ട്രെയിന്‍ ഓടിച്ച് കാണിക്കാമെന്ന് മുഖ്യമന്ത്രി അരവിന്ദ് കേജ്‌രിവാള്‍ കേന്ദ്രസര്‍ക്കാരിനെ വെല്ലുവിളിച്ചിരുന്നു.
https://www.facebook.com/Malayalivartha
